Qazaqstanda kómirsýtekterdi barlaýǵa arnalǵan elektrondyq aýktsıon ótti
«Jer qoınaýy jáne jer qoınaýyn paıdalaný týraly» QR Kodeksine sáıkes 2020 jylǵy 1 qyrkúıekten bastap QR Energetıka mınıstrligi kómirsýtekter boıynsha jer qoınaýyn paıdalaný quqyǵyn berýge elektrondyq formatta aýktsıon ótkizedi. Mınıstrlik ınternet-resýrsta kómirsýtekterge arnalǵan jer qoınaýyn paıdalaný quqyǵyn berý boıynsha aýktsıon ótkizý týraly 2021 jyldyń 18 tamyzynda 22 jer qoınaýy ýchaskesi boıynsha habarlamany ornalastyrdy. Aýktsıondy ótkizý kúni 2021 jylǵy 19 qarashaǵa belgilengen. Eń az qatysýshylar sanynyń bolmaýyna baılanysty 8 ýchaske boıynsha aýktsıon toqtatyldy», - delingen atalǵan vedomstvo baspasóz qyzmetiniń málimetinde.
2021 jylǵy 19 qarashada saǵat 17:00-de Nur-Sultan ýaqytymen kómirsýtekter boıynsha jer qoınaýyn paıdalaný quqyǵyn berýge arnalǵan aýktsıon aıaqtaldy. Ótkizilgen aýktsıon nátıjesi boıynsha 14 jer qoınaýy ýchaskesi boıynsha aýktsıon jeńimpazdary anyqtaldy. 14 ýchaske boıynsha qol qoıý bonýstarynyń bastapqy mólsheriniń somasy 425 mln teńgeni qurady. Aýktsıon nátıjesi boıynsha qol qoıý bonýsynyń túpkilikti mólsheriniń jalpy somasy shamamen 1,8 mıllıard teńgege jetti.
«Jer qoınaýy jáne jer qoınaýyn paıdalaný týraly» Kodekstiń 100-babynyń 3-tarmaǵyna sáıkes, aýktsıon jeńimpazy aýktsıon qorytyndylary jarııalanǵan kúninen bastap jıyrma jumys kúni ishinde:
1) qol qoıý bonýsyn tóleıdi;
2) quzyretti organǵa qol qoıylatyn bonýstyń tólengenin rastaýdy jáne óz tarapynan qol qoıylǵan quzyretti organ bekitetin kómirsýtekterdi barlaýǵa jáne óndirýge nemese óndirýge arnalǵan úlgilik kelisimshartqa sáıkes, ázirlengen kómirsýtekterdi barlaýǵa ári óndirýge nemese óndirýge arnalǵan kelisimshartty jiberedi.
«Eger aýktsıon jeńimpazy kodekstiń 100-babynyń 3-tarmaǵynda kórsetilgen merzim ishinde qol qoıylatyn bonýsty tólemegen nemese óz tarapynan qol qoıylǵan jer qoınaýyn paıdalanýǵa arnalǵan kelisimshartty quzyretti organǵa usynbaǵan jaǵdaıda, mundaı tulǵa kelisimshart jasasý quqyǵynan aıyrylady, al jer qoınaýy ýchaskesi aýktsıonǵa qaıta shyǵarylady. Aýktsıon arqyly jerge menshik quqyǵy emes, jer qoınaýyn paıdalaný quqyǵy beriletinin atap ótý mańyzdy. Bul quqyq «Jer qoınaýy jáne jer qoınaýyn paıdalaný» kodeksimen retteledi, ýchaskelerdegi kez kelgen tehnologııalyq protsester QR Energetıka mınıstrligi janyndaǵy Barlaý jáne ıgerý jónindegi ortalyq komıssııada qaralady», - dep atalyp ótken habarlamada.
Jer qoınaýyn paıdalaný quqyǵyn alǵan ınvestor jergilikti atqarýshy organmen jerdi jaldaý týraly shartqa qol qoıady. Jobalaý qujatyn ázirleý aldynda árbir jer qoınaýyn paıdalanýshy jergilikti turǵyndardyń qatysýymen qoǵamdyq tyńdaýlar ótkizýge mindetti.
Aýktsıondar onlaın rejıminde jáne jasyryn ótetindikten, qatysýshylar bir-birin kórmeıdi. Bul aqparat osy aýktsıondardyń ótkizilýine jetekshilik etetin QR Energetıka mınıstrliginiń mamandary úshin de qol jetimdi emes. Onlaın aýktsıon qyzmeti 2020 jylǵy 1 qyrkúıekte Memlekettik múlik tiziliminiń www.gosreestr.kz portalynda iske qosyldy, onyń ázirleýshisi jáne ıesi – «Aqparattyq-esepteý ortalyǵy» AQ. Aýktsıonnyń barysyn kez kelgen adam baqylaı alady.
Aýktsıonnan túsken barlyq qarajat memlekettik bıýdjetke baǵyttalady.