Qazaqstanda kómir tutyný kólemi azaıady

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi jasaǵan aldaǵy jylytý maýsymyna qajettilik josparyna sáıkes, aldaǵy qysta elimizde kómirdi tutyný kólemi 10 mln tonnadan 7,3 mln tonnaǵa deıin tómendeıdi.

Bul týraly atalǵan mınıstrliktiń baspasóz qyzmetinen málim boldy, dep habarlaıdy QazAqparat.

«Negizgi sebep - eldi mekenderge gaz tartý kóleminiń ulǵaıýy. Nátıjesinde, kómirdi tutyný 4,8 mln tonnaǵa deıin tómendeıdi (ótken qystyń kórsetkishi - 7,2 mln tonna). Aldyn ala málimet boıynsha, bıylǵy birinshi jartyjyldyqta kommýnaldyq-turmystyq qajettilikterge jáne turǵyndarǵa 3,4 mln tonna kómir tıeldi. Energııa óndirýshi kásiporyndarǵa 31,3 mln tonna, ónerkásiptik kásiporyndardyń qajettilikterine 2,9 mln tonna jóneltildi. 14,5 mln tonna eksportqa ketti», - delingen mınıstrlik málimetinde.

ShQO, SQO jáne Almaty qalasyn qospaǵanda, barlyq óńirler 2021-2022 jylǵy jylý berý kezeńinde kómir ónimine degen qajettilikterin rastap, jańa maýsymǵa daıyndyqty bastap ketti. Kómir satyp alýǵa tenderler jarııalanyp, óńirlik operatorlar aıqyndaldy.

Otandyq kómir óndirýshi kompanııalar 2021 jylǵy qańtar-shilde aılarynda barlyǵy 59,7 mln tonna kómir (kómir kontsentratyn qospaǵanda) nemese ótken jylǵy kórsetkishpen salystyrǵanda 98,9% óndirdi.

Kómirdi negizinen tórt kómir óndirýshi kompanııa jetkizedi. Olardyń naryqtyq úlesi jetkizýdiń jalpy kóleminiń 89%-na teń.

«Kómir energetıkalyq kásiporyndarǵa razrezderdiń bosatý baǵalarymen jóneltiledi. Al kommýnaldyq-turmystyq tutynýshylar men halyq úshin kómirdiń negizgi kólemi taýar bırjasy arqyly ótkiziledi. Bıyl bırja komıtetiniń hattamasymen kommýnaldyq-turmystyq kómirdi taýar bırjalary arqyly ótkizý jónindegi sektsııalyq qaǵıdalar bekitildi. Jańa erejeler naryqtyq obektıvti baǵa ındıkatorlaryn (tutynýshylar úshin monopolııalyq joǵary emes jáne jetkizýshiler úshin tıimsiz tómen emes) qalyptastyrýǵa kómektesýge arnalǵan. Jańa qaǵıdalar boıynsha óńirlik operatorlar oblystyń kómir qajettiliginiń 10% taýar bırjasy arqyly tikeleı alady. Maqsat - araǵa deldaldardy qatystyrmaý. Kómirdiń qalǵan 90% kómir óndirýshi kompanııalar óz talaptarymen ótkize alady. ıAǵnı, tikeleı kelisimsharttar, bırjalyq saýda arqyly. Alaıda onyń da baǵasy monopolııaǵa qarsy organnyń baqylaýynda bolady», - dep atalyp ótken habarlamada.