Qazaqstanda kómir qymbattaýy múmkin

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Indýstrııalyq damý komıtetiniń tóraǵasy Іlııas Ospanov el óńirlerindegi kómir baǵasy týraly aıtyp berdi, dep habarlaıdy QazAqparat tilshisi.

«Aýa raıynyń sýytýymen birge kómirge suranys ta artyp keledi. Shamamen qyrkúıektiń aıaǵy men qazan aıynyń basynda kún sýytady degen boljam bar. Tıisinshe, kómir baǵasy da ósýi múmkin», - dedi Іlııas Ospanov Ortalyq kommýnıkatsııalar qyzmetinde ótken baspasóz máslıhatynda.

Degenmen spıker kómirdiń 1,5-2 esege deıin kúrt qymbattamaıtynyn eskertti. Qandaı da bir óńir kómir óndiretin orynnan alys ornalassa, qatty otynnyń quny da arta túspek.

«Qazirgi ýaqytta bir tonna kómirdiń ortasha baǵasy 9-dan 14 myń teńgege deıin jetedi. Keı oblystar mysaly, Qaraǵandy, Pavlodar oblystary kómirdi razezderden tikeleı alǵandyqtan 7-8 myń teńgege alady», - dedi Іlııas Ospanov.

Komıtet tóraǵasynyń aıtýynsha, ońtústik óńirlerde kómir qymbatqa satylady.

Buǵan deıin Іlııas Ospanov Qazaqstanda jylytý maýsymyna daıyndyq qalaı júrip jatqanyn aıtqan edi.