Qazaqstanda qolma qol aqshany paıdalanýdy shekteý sharalary keńeıe túsedi - A. Ahmetov
UB ókiliniń aıtýynsha, zań jobasy tólem naryǵynyń ashyqtyǵyn arttyra túsedi. Ondaı qyzmetterdi retteý naryǵyna jańa oıynshylardyń da qosylatyny kútiledi. Tólemder atqarý boıynsha banktik úderister de ońtaılandyrylady.
«Búgingi baǵytymyz boıynsha biz halyqaralyq standarttar aıasyndaǵy sharalardy qabyldap otyrmyz. Al qazir búkil álemde qolma qol aqsha arqyly esep aıyrysý meılinshe azaıyp bara jatyr.
Ekinshiden, sybaılas jemqorlyqqa qarsy sharalar aıasynda, terrorızmdi qarjylandyrý jáne zańsyz alynǵan qarajatty jylystatýǵa qarsy kúres boıynsha qolma qol aqshany barynsha tómendetý kózdelip otyr. Bul jeke tulǵalar arasyndaǵy barlyq operatsııalarǵa qatysty bolyp tabylady. Úshinshiden, bunda eshqandaı da bankilik lobbıleý joq. Kerisinshe, tólem kartasymen esep aıysyrýlar barysynda bankten komıssııalar alynbaıdy», - dedi talqylaý depýtattar saýalyna jaýap bergen UB tóraǵasynyń orynbasary Alpysbaı Ahmetov.
Onyń aıtýynsha, zań jobasyn qabyldaý tólem kartasy júıesin meılinshe qoldanýdy yntalandyrady. Sonymen qatar, halyqqa usynylatyn qolma qol aqshasyz qyzmet túrleriniń aıasy da keńeıe túsedi. «Máselen, ekinshi deńgeıli bankter agenttermen, sýbagenttermen kelisimsharttarǵa otyrady. Sol arqyly banktik sektor qyzmeti qarapaıym halyqqa, aýyldaǵy azamattarǵa da jaqyndaı túsedi. Aıtalyq, aýyldyq óńirlerde bank fılıaldarv joq. Alaıda, endigide bank aýyldardaǵy dúkendermen kelisimshartqa otyryp, olar arqyly qyzmetter kórsetý aýqymyn keńeıte alady. Osynyń arqasynda aýyldaǵy halyq qandaı da bir tólemder jasaý úshin aýdan ortalyǵyna barmaı-aq, aýyldaǵy banktiń agentteri (dúkender) arqyly esep aıyrysyp, tólemder jasaı bastaıdy. Bul tólemniń jedeldiligi jaǵynan da tıimdi», - dedi A. Ahmetov.