Qazaqstanda Kóliktik baqylaýdyń ıntellektýaldy júıesi paıda bolady

NUR-SULTAN. QazAqparat – Aldaǵy ýaqytta Qazaqstanda Kóliktik baqylaýdyń ıntellektýaldy júıesi iske qosylady. Bul týraly QR Premer-Mınıstri Asqar Mamın aıtty, dep habarlaıdy QazAqparat tilshisi.

«Avtomobıl kóligi salasynda kóliktik baqylaý ýchaskesin tsıfrlandyrý maqsatynda Indýstrııa jáne ınfraqurylymdyq damý mınıstrligi Kóliktik baqylaýdyń ıntellektýaldy júıesin qurý jáne engizý boıynsha jumystar júrgizip jatyr», - delingen A. Mamınniń depýtattyq saýalǵa bergen jaýabynda.

Onyń aıtýynsha, júıe jolaýshy jáne júk tasymaldaıtyn avtokólik quraldarynyń qashyqtan júrip ótýin júzege asyra otyryp (elektrondy kólik jáne ruqsat qujattaryn tekserý, ruqsat etilgen salmaq-gabarıttik parametrlerdiń sáıkestigi jáne t.b.), quqyq buzýshylarǵa aıyppul tóleý týraly nusqamalardy avtomatty túrde qalyptastyrady ári jiberedi. Bul baǵyttaǵy qadamdar kóliktik baqylaýdy júzege asyrý kezinde adamı faktordy boldyrmaýǵa baǵyttalǵan.

«Júıeni qurý boıynsha is-shara 2023 jyly iske asyrý merzimimen «Tsıfrlandyrý, ǵylym jáne ınnovatsııalar esebinen tehnologııalyq serpilis» ulttyq jobasyna engizilgen. Qazirgi ýaqytta Júıeni qurýǵa ınvestıtsııalyq usynys pen tehnıkalyq tapsyrmany ázirleý máselesi qarastyrylyp jatyr», - dedi Úkimet basshysy.

Eske sala keteıik, senator Nurlan Qylyshbaev elimizdiń Premer-Mınıstri Asqar Mamınniń atyna joldaǵan depýtattyq saýalynda kásipkerlerdiń Qytaımen shekara arqyly taýar tasymaldaý kezinde kezdesetin máselelerin kóterdi.