Qazaqstanda kólik urlaýmen aınalysqan 36 qylmystyq top ustaldy

ASTANA. QazAqparat – QR Іshki ister mınıstriniń birinshi orynbasary Marat Qojaev elimizde kólik urlaý qylmystary azaıǵanyn aıtty, dep habarlaıdy QazAqparat tilshisi.

Onyń sózine qaraǵanda, avtokólik urlaý derekteriniń 70 paıyzynda buryn osyndaı quqyqqa qaıshy áreketter jasaǵan jáne tehnıkalyq quraldardy paıdalana otyryp, avtomobılderdiń esigin asha alatyn adamdardyń qatysy bar ekeni anyqtalyp otyr.

«Qazirgi ýaqytta Іshki ister mınıstrliginiń tirkeýinde kólik urlaý sanaty boıynsha 3086 adam tur. Bıyl qabyldanǵan sharalardyń nátıjesinde, urlyq jasaǵan jáne bireýdiń kóligin minip ketkeni úshin 1046 adam, onyń ishinde 68 qylmys epızodyn jasaǵan 36 qylmystyq top ustaldy. Sonyń arasynda 732 adam buryn qylmystyq jaýapkershilikke tartylǵan», - dedi M. Qojaev Májilis depýtattarynyń saýalyna bergen jaýabynda.

Bıyl beınekamera arqyly 8892 qylmystyń beti ashyldy, onyń ishinde 226-sy kólik urlaý qylmysyna qatysty.

«Keıingi 5 jyldaǵy avtokólik urlaý men bireýdiń kóligin minip ketý áreketine qatysty qylmystaryǵa júrgizilgen taldaýǵa toqtalsaq, osy qylmystardyń 51,8 paıyzǵa azaıǵanyn baıqaýǵa bolady», - dedi mınıstrdiń birinshi orynbasary.

Foto: Axel Heimken/DPA/TASS