Qazaqstanda qoǵamdyq keńesterdiń quramy men jumysy túbegeıli jańarady

NUR-SULTAN. QazAqparat – Elimizde qoǵamdyq keńesterdiń jumys jospary men quramy qaıta jańarady. Bul týraly QR Prezıdenti Qasym-Jomart Toqaev halyqqa Joldaýynda málim etti, dep habarlaıdy QazAqparat tilshisi.

«Biz elimizde azamattyq belsendilikti jandandyrýymyz kerek. Memleket pen qoǵamnyń sanaly ári syndarly seriktestigine jol ashýymyz qajet. Sol sebepti ortalyq jáne jergilikti organdardyń kvazımemlekettik sektorynyń janyndaǵy qoǵamdyq kelisimderdi damytyp jatyrmyz. Men birneshe ret olardyń qyzmetine qatysty syn aıtqan bolatynmyn. Degenmen bul keńesterdiń orasan zor ınstıtýtsıonaldyq áleýeti bar», - dedi Qasym-Jomart Toqaev.

Memleket basshysynyń aıtýynsha, qoǵamdyq keńester jumysynyń aıasyn keńeıtý qajet.

«Bıyl meniń bastamam boıynsha qoǵamdyq keńesterdiń quramy ıaǵnı jumys jospary túbegeıli jańaratyn bolady. «Kelisip pishken ton, kelte bolmas», degen naqyl sóz bar. Babalarymyz el taǵdyryn aıqyndaıtyn tarıhı sheshimderdi, búkil halyq bolyp aqyldasyp, birge qabyldaǵan. Ulytaýda, Ordabasy men Kúltóbeden ótken uly basqosýlar sonyń aıqyn dáleli. Keleli jıynda aıtylǵan, qısyndy sózge alty Alashtyń balasy túgel toqtaǵan», - deıdi ol.