Qazaqstanda klımat máseleleri boıynsha Ortalyq Azııanyń aımaqtyq habyn qurý usynyldy
Mınıstr Maǵzum Myrzaǵalıev mundaı usynysty AQSh Prezıdentiniń klımat boıynsha arnaıy ókilimen ótken Klımat boıynsha kóshbasshylar sammıti aıasyndaǵy dóńgelek ústel kezinde aıtty.
«AQSh Prezıdentiniń klımat boıynsha arnaıy ókilimen ótken Klımat boıynsha kóshbasshylar sammıti aıasyndaǵy dóńgelek ústelge qatystym. Elimizdegi kómirekti beıtaraptyqqa jetýge baǵyttalǵan sharalar jóninde aıttym. Jańa Ekologııalyq kodekstiń normalary neǵurlym álsiz sektorlardyń klımattyń ózgerýine beıimdelý úrdisine júzege asyrýǵa qolaıly jaǵdaı týǵyzatynyn atap óttim. Sonymen birge elimizdiń AQSh-tyń jasyl qarjylandyrý granttyq baǵdarlamalaryna qatysýǵa daıyn ekenin jetkizdim. Bul eldiń 2050 jylǵa deıin tómenkómirtekti damý Tujyrymdamasyna sáıkes tereń dekorbanızatsııa boıynsha neǵurlym joǵary nátıjege qol jetkizý úshin qajet. Atalǵan sharalar shyǵaryndylar kólemin 71%-ǵa tómendetedi», - dep jazdy vedomstvo basshysy Twitter-degi paraqshasynda.
Budan bólek mınıstr Qazaqstan klımattyń ózgerýi salasynda ǵalamdyq kún tártibin qoldaýǵa árqashan daıyn ekenin jetkizgen.
«Jalpy Qazaqstan TMD boıynsha Parıj kelisimin birinshi bolyp ratıfıkatsııalady, sonymen qatar bizdiń elimiz Orta Azııada «jasyl ekonomıka» boıynsha kóshbasshy sanalady. Sondyqtan Qazaqstanda klımat máseleleri boıynsha Ortalyq Azııanyń aımaqtyq habyn qurý týraly bastama kóterdim. Habtyń júmysy arqyly Ortalyq Azııada «jasyl» ekonomıkalyq ósimdi qamtamasyz etip, tehnologııalarmen, bilim jáne tájirıbemen almasýǵa bolady. Halyqaralyq qarjy ınstıtýttarynan qoldaý tabýǵa múmkindik bar. Qazaqstan klımattyń ózgerýi salasynda ǵalamdyq kún tártibin qoldaýǵa árqashan daıyn», - dep jazdy mınıstr.