Qazaqstanda qyzylshadan eki bala kóz jumdy

<p>Densaýlyq saqtaý vıtse-mınıstri, memlekettik bas sanıtar dáriger Aıjan Esmaǵambetova Qazaqstanda qyzylshadan eki adam kóz jumǵanyn aıtty, dep habarlaıdy Kazinform agenttigi.</p>

«Qyzylsha aýrýynan 2 bala ólimi tirkeldi. Olar – 1 jasqa deıingi balalar. Olar qyzylshaǵa qarsy ekpe alý jasyna tolmaǵan. Bul oqıǵa Astana men Shyǵys Qazaqstan oblysynda boldy. Bir bala shala týǵan. Onyń buǵan deıin de basqa da ilespe aýrýlary bolǵan. Sońyna ol qyzylsha juqtyrǵan», - dedi A. Esmaǵambetova Senattyń jalpy otyrysynan keıin tilshiler suraǵyna jaýap bere otyryp.

Aıta keteıik, elimizde qyzylsha ınfektsııasynyń taralýyna qarsy jappaı ımmýndaý júrip jatyr. Búginde qosymsha vaktsınalaýǵa jatatyn 1,5 mln adamnyń 608 myńnan astamy egildi, qamtý 40,5% qurady.

Qyzylshaǵa qarsy josparly vaktsınalaý da jalǵasyp jatyr. Máselen, jyl saıyn 1 jáne 6 jastaǵy 700 myńǵa jýyq bala egiledi (DDU usynǵan keminde 87,1% kezinde 1 jastaǵy balalardyń 94,1% jáne 6 jastaǵy balalardyń 93,4% qamtyldy).