Qazaqstanda qysta demalýǵa arnalǵan TOP-5 oryn

<p>ASTANA. KAZINFORM &mdash; QR Týrızm jáne sport mınıstrligi qysta demalýǵa bolatyn erekshe demalys aımaqtaryn atady. Qaıda baryp, demalamyn dep júrseńiz tanysa otyryńyz.&nbsp;&nbsp;</p>

Şýche-Býrabaı kýrorttyq aımaǵy

Şýche-Býrabaı kýrorttyq aımaǵy Qazaqstandaǵy qysqy demalystyń negizgi baǵyttarynyń biri sanalady. Óńir tumsa tabıǵatymen, taza aýasymen jáne joǵary deńgeıdegi jaılylyǵymen týrısterdi birden baýrap alady. 2024 jylǵy qańtar-maýsym aralyǵynda óńirde týrıstik aǵynnyń aıtarlyqtaı artqany baıqaldy. Ornalastyrý oryndarynyń sany 203-ke jetip, qyzmet kórsetilgen qonaqtar sany 143 629 adamǵa jetti. Bul ótken jyldyń sáıkes kezeńimen salystyrǵanda 10 949 adamǵa kóp.

Foto: «Býrabaı» MUTP baspasóz qyzmeti

Infraqurylymnyń damýy men qyzmet kórsetý sapasynyń jaqsarýy aımaqtyń tartymdylyǵyn arttyrýda mańyzdy ról atqarady.

Almaty taý klasteri

Almaty taý klasteri taýly jáne qysqy sportty unatatyndarǵa belsendi demalystyń alýan túrin usynady. 2024 jyldyń birinshi jartyjyldyǵynda kýrort 1,2 mıllıonnan astam qonaqty qabyldap, ornalastyrý oryndarynyń sany 518-ge jetken.

Foto: Aleksandr Pavskıı/ Kazinform

Almaty taý klasteri ınfraqurylym men qyzmet kórsetý deńgeıin udaıy jetildirip, otandyq jáne sheteldik týrıster úshin odan da tartymdy etedi.

Katonqaraǵaı kýrorttyq aımaǵy

Katonqaraǵaı kýrorttyq aımaǵynyń tabıǵaty — tynysh ári ońasha demalysty súıetinder úshin taptyrmas oryndardyń biri.

Foto: Katonkaragi_audany_live/Instagram

2024 jyldyń alǵashqy alty aıynda kýrorttyq aımaq ótken jyldyń osy kezeńimen salystyrǵanda eki ese kóp qonaq qabyldap, usynylǵan qyzmetterdiń kólemi 17,7 mıllıon teńgege ósken.

Sharyn shatqaly

Sharyn shatqaly — qys mezgilinde erekshe atmosferaǵa bólenip, tabıǵat sulýlyǵyn baǵalaıtyn týrısterge shabyt syılaıtyn meken. Keńeıtilgen ınfraqurylym men jańa demalys oryndary aımaqtyń týrıstik tartymdylyǵyn arttyrýda mańyzdy ról atqarýda.

Foto: QR Sport jáne týrızm mınıstrligi

Sharyn shatqaly kelýshilerge tańǵajaıyp tabıǵat kórinisterimen demalýǵa yńǵaıly múmkindikter usynady.

Kókshetaý jáne onyń aınalasyndaǵy kólder

Kókshetaý jáne aınalasyndaǵy kólder shańǵy ári snoýbord tebý sııaqty tynysh demalys pen belsendi kóńil kóterýdi biriktiretin tamasha oryndardy usynady. Qazirgi tańda aımaqtyń týrıstik ınfraqurylymy qarqyndy damyp keledi. Bul óz kezeginde óńirdi otbasy músheleri úshin qysqy demalys orny retinde tartymdy etedi.