Qazaqstanda kimder áskerı boryshyn óteýdi keıinge qaldyra alady

ASTANA. QazAqparat – Elimizde áskerı boryshyn óteýdi keıinge qaldyrýdyń birneshe joly bar. Osy oraıda QR Qorǵanys mınıstrligi keıinge qaldyrý kimderge jáne ne sebepten beriletinin túsindirdi, dep habarlaıdy QazAqparat tilshisi.

«Áskerı qyzmet jáne áskerı qyzmetshilerdiń mártebesi týraly» QR Zańynyń 35-babyna sáıkes áskerı qyzmetke shaqyrýdy keıinge qaldyrý azamattarǵa aýdandyq (oblystyq mańyzy bar qalalar) shaqyrý komıssııasynyń sheshimi boıynsha beriledi.

Áskerı boryshyn keıinge qaldyrý myna negizder boıynsha beriledi:

1) otbasy jaǵdaıy boıynsha;

2) bilim alýdy jalǵastyrý úshin;

3) densaýlyq jaǵdaıy boıynsha;

4) taǵy basqa sebepter.

Qorǵanys mınıstrliginde túsindirgendeı, otbasy jaǵdaıy boıynsha áskerge shaqyrýdy keıinge qaldyrý adamnyń kómegine muqtaj jáne memlekettiń tolyq qamqorlyǵyna jatpaıtyn otbasy múshelerin kútýmen aınalysatyn azamattarǵa beriledi.

ıAǵnı kútimdi qajet etetin jandarǵa qamqor bolatyn Qazaqstan aýmaǵynda otbasy músheleri nemese jaqyn týystary joq bolǵan jaǵdaıda.

Bógdeniń kómegi men kútimine muqtaj otbasy músheleri:

- áskerge shaqyrylýshynyń ata-anasy bolmaǵan kezde. Sonymen qatar eger onyń asyraýynda zeınetker nemese І nemese ІІ toptaǵy múgedektigi bar ákesi, anasy, jubaıy, sondaı-aq atasy men ájesi bolǵan jaǵdaıda;

- ata-anasy bolmaǵan kezde І nemese ІІ toptaǵy múgedek bolyp tabylatyn nemese 18 jasqa tolmaǵan aǵa-inileri, apa-sińlileri (qaryndastary) bolsa;

- áskerge shaqyrylýshydan basqa, І nemese ІІ toptaǵy múgedek jan nemese 18 jasqa tolmaǵan bir jáne odan da kóp balasy bar jáne olardy jubaıynsyz tárbıelep otyrǵan jaǵdaıda;

- asyraýynda jasy boıynsha eńbekke qabiletsiz nemese І nemese ІІ toptaǵy múgedektigi bar adamdar bolyp tabylatyn bir jáne odan da kóp týystary (ákesi, anasy, aǵa-inisi, apa-sińlisi) bar jáne olardy jubaısyz asyrap otqan jaǵdaıda.

- asyraýynda І nemese ІІ toptaǵy múgedektigi bar adam jáne áskerge shaqyrylýshydan basqa 18 jasqa deıingi bir jáne odan da kóp balany tárbıelep otyrǵan jaǵdaıda;

- múgedektigi bar jáne áskerge shaqyrylýshy jalǵyz er bala bolatyn otbasy músheleriniń biri.

Sonymen qatar, olardyń asyraýynda bolǵan azamattarǵa keıinge qaldyrý usynylady:

- anasy joq bala (balalar);

- ata-anasy qaıtys bolsa, ata-ana quqyǵynan nemese sottyń bas bostandyǵynan aıyrýǵa baılanysty olar keminde eki jyl tárbıeleýde jáne baǵyp-kútýde bolǵan adamdardy;

Bilim alýdy jalǵastyrý úshin áskerı qyzmetke shaqyrýdy keıinge qaldyrý:

1) bilim berý uıymdarynda jalpy orta bilim alatyn azamattarǵa oqý kezeńine;

2) tıisti bilim berý uıymdarynda kúndizgi oqý nysany boıynsha tehnıkalyq jáne kásiptik, orta bilimnen keıingi nemese joǵary bilim, basqa memleketterdiń rýhanı (dinı) bilim berý uıymdarynda, sondaı-aq joǵary jáne joǵary oqý ornynan keıingi bilim berý uıymdarynda kúndizgi bilim alatyn azamattarǵa oqýy týraly rastaıtyn qujattardy usynǵan kezde bilim alýdy aıaqtaǵanǵa deıin;

3) joǵary oqý ornynan keıingi kásiptik bilim alatyn azamattarǵa beriledi.

Atalǵan vedomstvonyń málimetinshe, bilim alýdy jalǵastyrý úshin áskerı qyzmetke shaqyrýdy keıinge qaldyrý qashyqtan oqıtyn azamattarǵa berilmeıdi.

«Densaýlyq jaǵdaıy boıynsha áskerı qyzmetke shaqyrýdy keıinge qaldyrý azamattarǵa shaqyrý komıssııasynyń sheshimimen bir jylǵa deıingi merzimge beriledi», - dep habarlaıdy Qorǵanys mınıstrligi.

Bul rette basqa da sebepter boıynsha áskerı qyzmetke shaqyrýdy keıinge qaldyrý:

-mektepke deıingi bilim berý uıymdarynda, orta (bastaýysh, negizgi orta, jalpy orta), tehnıkalyq jáne kásiptik, orta bilimnen keıingi bilim berý uıymdarynda, mamandandyrylǵan, arnaıy bilim berý uıymdarynda, jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uıymdarynda, balalarǵa arnalǵan qosymsha bilim berý uıymdarynda jáne mektepke deıingi bilim berý uıymdarynda ádistemelik kabınetterde jumys isteıtin pedagogter bosatylady.

- tıisti bilimi bar, mamandyǵy boıynsha aýyldyq jerde turaqty jumys isteıtin dárigerlerge;

- Qazaqstan Respýblıkasy Parlamentiniń nemese jergilikti ókildi organdardyń depýtattaryna;

- anyqtaý, aldyn ala tergeý júrgizilip jatqan nemese sottar qylmystyq isterin qarap jatqan adamdarǵa tıisinshe anyqtaý, tergeý aıaqtalǵanǵa nemese sot úkimi kúshine engenge deıin;

- azamattyq avıatsııa uıymdarynda jumys isteıtin azamattyq áýe kemeleri ushý ekıpajdarynyń múshelerine, azamattyq avıatsııanyń tıisti bilimi bar ınjenerlerine, mehanıkteri men tehnıkterine;

- sý kóligi uıymdarynda jumys isteıtin tıisti bilimi bar keme ekıpajdarynyń múshelerine;

- quqyq qorǵaý organdarynyń bilim berý uıymdarynda bastapqy kásiptik daıarlyqtan ótetin adamdarǵa beriledi.