Qazaqstanda kıim óndirisi 7,5 paıyzǵa artty
«Toqyma buıymdary 23,7 paıyzǵa, al kıim-keshek óndirisi 7,5 paıyzǵa artty. Jeńil ónerkásip salasy úsh negizgi topty biriktiredi, ıaǵnı toqyma ónerkásibi - 52%, kıim-keshek óndirisi - 38%, sondaı-aq, bylǵary jáne oǵan qatysty ónimder 10% quraıdy. 2019 jylǵy 1 qyrkúıektegi kórsetkishter boıynsha jeńil ónerkásip baǵytynda 1030 kásiporyn jumys isteıdi, olardyń 96% - bul shaǵyn kásiporyndar, qyzmetkerlerdiń tizimdik sany shamamen 11 myń adam. Elimizde jeńil ónerkásip baǵytynda jumys isteıtin kásiporyndar ulttyq kompanııalar, densaýlyq saqtaý salasyndaǵy uıymdarǵa, Qazaqstannyń Qarýly Kúshteri men tártip saqshylaryna, sondaı-aq qarapaıym halyqqa arnalǵan kıimderdi shyǵarady», - delingen Indýstrııa jáne ınfraqurylymdyq damý mınıstrligi málimetinde.
Olardyń qatarynda syrt kıimder, erlerge arnalǵan kostıýmder, balalar kıimi, bas kıim, úı toqymasy jáne aıaq kıimder bar. Budan basqa, otandyq kásiporyndar maqta-mata ıirilgen jipter men matalar, kilem, bylǵary ónimderin halyqqa usynady.
2018 jyly 5 jańa joba paıdalanýǵa berildi, olardyń qataryndaǵy eki bastama «Ońtústik» AEA-da ornalasqan. Jańa kásiporyn 400-den astam adamdy jumyspen qamtamasyz etti. Sonymen qatar, 2019 jyly kilem jáne kilem buıymdaryn shyǵaratyn «Bal toqyma» JShS-niń jobasy iske qosylyp, 45 jumys orny ashyldy.
QR Tuńǵysh Prezıdenti N.Nazarbaevtyń 2018 jyldyń 5 qazanyndaǵy halyqqa joldaýyn júzege asyrý aıasynda Úkimet músheleri qoljetimdi nesıelendirý qaýlysyn qabyldaǵan bolatyn. Baǵdarlama aıasynda ekinshi deńgeıli bankter jeńil ónerkásip baǵytyndaǵy jalpy somasy 4,3 mlrd teńgeni quraıtyn 21 jobany qoldady.
Sonymen qatar, QR Indýstrııa jáne ınfraqurylymdyq damý mınıstrligi 2019 – 2021 jyldarǵa arnalǵan jeńil ónerkásipti damytý boıynsha jol kartasyn ázirledi.