Qazaqstanda kıikterdi qorǵaý úshin 200-den astam mobıldi top quryldy

ASTANA. QazAqparat – Elimizde «Brakoner» aktsııasy ótip jatyr. Maqsat- kıikterdi zańsyz aýlaýdan qorǵaý. Atalǵan sharany Ekologııa jáne ishki ister mınıstrligi birlesip ótkizýde, dep habarlaıdy QazAqparat tilshisi.

«Elimizde kıikterdi qorǵaý operatsııasy bastaldy. Ol úshin Ekologııa mınıstrliginiń aýmaqtyq bólimsheleriniń qyzmetkerleri men polıtseılermen birlesken 203 mobıldi top quryldy. Operatsııa barysynda ańshylyq sharýashylyqtary, ormandar men janýarlar dúnıesin qorǵaý jónindegi memlekettik mekemelerdiń aýmaqtary, sondaı-aq erekshe qorǵalatyn tabıǵı aýmaqtar tekseriledi», - dedi Іshki ister mınıstrliginiń ókili Shuǵyla Turlybek vedomstvoda ótken baspasóz máslıhatynda.

Sondaı-aq, mınıstrlik ókili kıikterdi aýlaǵan jaǵdaıda jaýapkershiliktiń baryn eske saldy.

«Kıikterdi zańsyz aýlaý, óndirý, satyp alý, saqtaý, ótkizý, tasymaldaý úshin múlki tárkilenip, 3 jyldan 12 jylǵa deıin bas bostandyǵynan aıyrý qylmystyq jaýapkershilik qarastyrylǵan», - deıdi ol.