Qazaqstanda Kıbersport federatsııasy qurylady
Aıta keterligi, osy jyldyń qyrkúıek aıynda Ashhabadta ótken Azııa kıbersportynyń konfederatsııasy (Electronic Sports) Bas Assambleıasy barysynda atalǵan uıymnyń vıtse-prezıdenti bolyp Qazaqstan Respýblıkasynyń mádenıet jáne sport vıtse-mınıstri Sáken Musaıbekov saılanǵan edi.
«Qazir bizdiń aldymyzda Qazaqstannyń Kıbersport federatsııasyn qurý mindeti tur. Ony Ulttyq olımpıadalyq komıtet, sodan keıin Halyqaralyq kıbersport federatsııasy moıyndaýy tıis. Men vıtse-prezıdenti (Azııa kıbersportynyń konfederatsııasy) bolyp sanalamyn. Kúni keshe bizdiń qaıta saılanǵan prezıdentpen kezdestim. Ol yntymaqtastyqqa daıyn. Óıtkeni, Azııada kıbersport qarqyndy damyp kele jatyr», - dedi ol Úkimet úıinde ótken baspasóz máslıhatynan keıin BAQ ókilderiniń saýalyna oraı.
Onyń aıtýynsha, kıbersport Qazaqstanǵa endi kelip jatyr. Degenmen ony damytý mańyzdy bolyp otyr. Sebebi álemde bul sport túrin Olımpıada oıyndaryna qosýǵa baǵyttalǵan saıasat júrgizilýde.
«Búginde ózge jeke komandalardyń sapynda, biraq Qazaqstannyń týymen óner kórsetetin qazaqstandyqtar bar. Eger álem, Azııa, Eýropa chempıonattary, ıaǵnı Halyqaralyq Olımpıada komıteti moıyndaǵan jarystar ótip jatsa, onda sol balalardy quramaǵa shaqyramyz», - dedi Sáken Musaıbekov.
Sondaı-aq vıtse-mınıstr Qazaqstannyń Kıbersport federatsııasyn 2018 jyldyń 1 toqsanynda qurý josparlanyp otyrǵanyn jetkizdi.
Aıta keterligi, kıbersport qazirgi tańda álem boıynsha keń aýqymda óristep keledi. Sonymen qatar, sporttyń bul túri tuńǵysh ret V Azııa oıynynyń baǵdarlamasyna engizilip otyr. Qazirgi ýaqytta ony Djakartada (Indonezııa) ótetin aldaǵy Azııa oıyndarynyń baǵdarlamasyna engizý kózdelgen.