Qazaqstanda kıberqaýipsizdik mamandyǵy boıynsha onlaın-oqytý bastaldy

ASTANA. QazAqparat - QR Eńbek jáne halyqty áleýmettik qorǵaý mınıstrliginiń qoldaýymen Elektrondyq eńbek bırjasy portalynda qańtar aıynan bastap onlaın tsıfrlyq daǵdylar boıynsha oqytý bastaldy. Onlaın-oqytýdy «Eńbek resýrstaryn damytý ortalyǵy» AQ jáne «Cisco» akademııasy uıymdastyryp otyr, dep habarlaıdy QazAqparat tilshisi mınıstrliktiń baspasóz qyzmetine silteme jasap.

«Oqytý eki mamandyq, atap aıtqanda kıberqaýipsizdik jáne keshendi Internet júıesine kirispe boıynsha júrgiziledi. Oqý kýrsy 10 kúnge sozylady jáne teorııa men tájirıbeni qamtıdy. Kýrstyń sońynda azamattar búkil oqý mazmunyn qamtıtyn baǵa alady. Kýrsty aıaqtaǵany týraly sertıfıkat alý úshin oqýdy oıdaǵydaı aıaqtap, kýrs boıynsha saýalnamaǵa qatysý qajet», - delingen mınıstrliktiń habarlamasynda.

Sondaı-aq osy jyldyń aqpan aıynda jumyspen qamtý ortalyqtarynda eki mamandyq boıynsha (kompıýterlik grafıka jáne negizgi IT daǵdylary) boıynsha pılottyq rejimde oqytý josparlanyp otyr.

«Cisco Networking Academy baǵdarlamasy - oqýshylarǵa ǵalamdyq ekonomıkada qajetti ınternet tehnologııasy týraly bilim beretin elektrondyq oqytýdyń keshendi baǵdarlamasy. Network Academy baǵdarlamasy ınternet arqyly qoljetimdi materıaldardy, bilim berýdi baǵalaý quraldaryn, stýdentterdiń akademııalyq úlgerimin baqylaý quraldaryn, tájirıbelik zerthanalyq sabaqtardy jáne kásibı tanylǵan kásibı sertıfıkattardy alý úshin oqytý kýrstaryn qamtıdy», - dep habarlaıdy mınıstrliktiń baspasóz qyzmetinen.