Qazaqstanda kıberbýllıng taqyryby nelikten qyzý talqylanyp jatyr – depýtat pikiri
«BAQ týraly zańdy usynǵaly birneshe suhbat berdim. Ol zańda birneshe másele qamtylǵan. Onyń ishinde dál qazir jıi talqylanyp jatqany tek kıberbýllıng máselesi. Sonymen qatar áleýmettik jelige qatysty tusy. Bul meniń túsinigimshe, jýrnalıstik qaýymnyń taıazdyǵyn kórsetedi. Shyndyǵyn aıtsaq, bizdiń balalarymyzdyń taǵdyry, onyń ishinde psıhologııalyq, áleýmettik jaǵy kóbin qyzyqtyrmaıdy. Esesine áleýmettik jeli jumysynyń erkindigi bárine qyzyqty. Menińshe, bul haıp taqyryp. Óıtkeni, Úkimet áleýmettik jelini rasymen buǵattaǵysy kelse, osy zańsyz-aq, buǵan deıin qabyldanǵan zańnyń 41-shi babyna saı kez kelgen áleýmettik jelini tolyq túrde buǵattaýǵa múmkindigi bar», - dedi Aıdos Sarym elimizge tanymal jýrnalıst Búbigúl Jeksenbaıǵa bergen suhbatynda.
Halyq qalaýlysynyń aıtýynsha, BAQ týraly zań qabyldanǵan soń salaǵa qatysty máseleler óz ornyna qoıylady.
«Zańdy talqylaýda birinshi oqylymǵa deıin sonshalyqty másele týyndamaǵan. Onyń taǵdyryna eshkim asa mán de bermedi. Úkimettiń qorytyndysymen qaıtyp kelip, ekinshi oqylymda qabyldanǵan kezde keıbir adamdar úshin pıar jasaýdyń múmkindigin berdi. Aınalyp kelgende bul zańda jurt qorqatyndaı, úrketindeı eshteńe joq. Kerisinshe, óte mańyzdy mektep baǵdarlamasy, oqýlyqqa qatysty dúnıeler aıtylǵan», - deıdi ol.