Qazaqstanda kepildi tirkeý elektrondy formatqa aýystyryldy
«Jyljymaıtyn múlikke quqyqtardy tirkeý salasyndaǵy memlekettik qyzmetterdi avtomattandyrýdy qarastyratyn zańnamaǵa túzetýler qabyldandy. Mysaly, buryn eldi mekenderdiń, kóshelerdiń ataýlary, jyljymaıtyn múlik ıeleriniń aty-jóni ózgergen jaǵdaıda memlekettik tirkeý úsh jumys kúni ishinde júzege asyryldy. Tólem shamamen 500 teńgeni qurady. Jyl saıyn respýblıka boıynsha tirkeý organdaryna 35 myńnan astam mundaı ótinishter túsetin. Endi jyljymaıtyn múlik ıeleriniń tirkeýshi organǵa júginýdiń jáne osy ózgeristerdi tirkeý boıynsha shyǵyndardy kóterýdiń qajeti joq. Óıtkeni jańartylǵan málimetter memlekettik organdardyń tıisti aqparattyq júıelerinen quqyqtyq kadastrdyń aqparattyq júıesine avtomatty túrde túsedi», - dedi mınıstr onlaın rejımde halyq aldynda esep beri kezinde.
Onyń sózine qaraǵanda, jyljymaıtyn múliktiń menshik ıeleri tarapynan qarjylyq jáne ýaqytsha shyǵyndardy qysqartý maqsatynda kepildi tirkeý ekinshi deńgeıdegi banktermen aqparattyq ózara is-qımyl arqyly elektrondyq formatqa aýystyryldy.
«Osy ózara is-qımyl aıasynda jyljymaıtyn múlik ıesine qujattardy tapsyrý úshin Halyqqa qyzmet kórsetý ortalyqtaryna júginýdiń qajeti joq. Sebebi bankter kepil týraly málimetterdi tirkeý úshin elektrondy formatta tirkeýshi organǵa óz betinshe jiberedi. Tirkeý bir jumys kúni ishinde júzege asyrylady. Qazirgi kezde Nur-Sultan jáne Shymkent qalalarynda kepildi elektrondyq tirkeýdi júzege asyrý boıynsha qanatqaqty joba iske qosyldy», - dep túsindirdi M. Beketaev.
Budan buryn habarlanǵandaı, Ádilet mınıstri qurylǵan «Áleýmettik qordyń» negizgi mindetin túsindirdi.