Qazaqstanda keńse qaǵazynyń quny 67 %-ǵa ósti

NUR-SULTAN. QazAqparat - Byltyr ishki naryqta paıdalaný úshin Qazaqstanǵa A4 formatyndaǵy keńse qaǵazynyń 20,4 mln qaptamasy, ıaǵnı 51 myń tonnasy jetkizilgen, dep habarlaıdy Qazaqparat tilshisi.

Indýstrııa jáne ınfraqurylymdyq damý mınıstrliginiń resmı derekkózinde munyń 61 %-y Reseı Federatsııasynan jetkizilgeni jazylǵan. Al 30 %-y – Túrkııadan, 8 %-y QHR-dan ımporttalǵan.

«Qazaqstan naryǵyna A4 formatyndaǵy qaǵaz ónimderiniń basym bóligi «Snegýrochka» jáne SvetoCopy brendterimen usynylǵan. Ótken jyly A4 qaptamasynyń ortasha kóterme baǵasy 1,5 myń teńgeni qurady. Bıylǵy naýryzǵa qaraı baǵalar orta eseppen 1 myń teńgege nemese 67 %-ǵa ósti. Qazir iri jetkizýshiler keńse qaǵazynyń 1 qaptamasyn 3 myń teńge kóterme baǵamen saýdalaıdy», - delingen vedomstvonyń habarlamasynda.

Baǵanyń ózgerýi Batys Eýropadan qaǵaz shıkizatyn aǵartýǵa arnalǵan reagentterdi jetkizýdegi irkilisterge baılanysty eken. Sonymen qatar RF-da keńse qaǵazyn óndirý kóleminiń qysqarýyna oraı oryn alyp otyr.

Aıta keterligi, Qazaqstanda keńsege arnalǵan qaǵazdy kesý jáne oraý boıynsha eki zaýyt jumys isteıdi. 2021 jyly kásiporyndar 600 myń A4 qaǵaz býmasyn óndirgen, bul ishki naryqtaǵy barlyq tutyný kóleminiń 5 %-yn ǵana quraıdy.

«Qagaz Ordasy» JShS jylyna 3 mln býma, al «Goida.kz» 3,6 mln A4 keńse qaǵazyn shyǵaratyn óndiristik qýatqa ıe. Kesýge jáne býyp-túıýge arnalǵan qaǵaz oramdary túrindegi shıkizattyń negizgi bóligi Reseı men Fınlıandııada óndiriledi. Alaıda, reseılik zaýyttar bul kompanııalarǵa qaǵaz oramdaryn tikeleı satpaı, olardy Qazaqstandaǵy óz ókilderi arqyly saýdalaıdy. Sáıkesinshe, bul saýda-sattyqty shektep otyr», - dep túsindirilgen aqparat kózinde.