Qazaqstanda keń aýqymdy qaıyrymdylyq aktsııa-telemarafony bastaldy

ASTANA. QazAqparat - Qyrkúıektiń sońyna deıin Qazaqstanda «Shyn júrekten» qaıyrymdylyq aktsııa-telemarafony ótedi. Bul týraly búgin Ortalyq kommýnıkatsııalar qyzmetindegi baspasóz máslıhatynda málim boldy.

«Búginnen bastap osy aı boıy Qazaqstanda qaıyrymdylyq úlken sharalar qamtylmaq. Ózderińizge belgili, Elbasy QHA sessııasynda bergen tapsyrmasyna oraı, búkil qaıyrymdylyq sharalar Assambleıanyń aınalasynda úılestirilip jatyr. Esterińizde bolsa, bıylǵy kóktemde Qazaqstan halqy Assambleıasy «Qazaqstan» RTRK» AQ-men «Shyn júrekten» keń aýqymdy úsh kúndik telemarafon ótkizgen bolatyn. Bul jobaǵa baılanysty elimizde osy kúnge deıini izgi nıetter aıtylýda»,-dedi Qazaqstan halqy Assambleıasy Tóraǵasynyń orynbasary, Qazaqstan halqy Assambleıasy Hatshylyǵynyń meńgerýshisi Eraly Toǵjanov.

Osy rette ol Qazaqstanda qaıyrymdylyqpen aınalysatyndar sany jyl saıyn eleýli túrde artyp kele jatqanyn atap ótti.

Uıymdastyrýshylardyń atap ótýinshe, qazaqstandyqtar úshin «Shyn júrekten» jobasynyń mańyzdylyǵy men qajettiligi óte joǵary. Sebebi, osy kúnge deıin uıymdastyrýshylarǵa elimizdiń azamattary tarapynan kóptegen ómirsheń máselelerdi sheshý boıynsha ótinishter kelip túsýde. Búgingi tańda 1200-den astam ótinish kelip túskendikten «Qazaqstan» RTRK» AQ medıaáriptesimen turaqty túrde toqsan saıyn osy jobany ótkizý týraly sheshim qabyldandy. «Shyn júrekten» qaıyrymdylyq sharasyna qazaqstandyqtardy jappaı tartý maqsatymen 7-29 qyrkúıek aralyǵynda qaıyrymdylyq aıy ótip, sońynda keń aýqymdy telemarafonmen aıaqtaý josparlanyp otyr.

Budan buryn habarlanǵandaı, respýblıkalyq aktsııa-telemarafony kómekke muqtaj azamattarǵa járdem jasaýǵa arnalǵan. Bul ıgi sharany QHA, «Qazaqstan halqy Assambleıasy» qoǵamdyq qory jáne «Qazaqstan» RTRK» AQ uıymdastyryp otyr.