Qazaqstanda kedeıler sany kóbeıdi - eńbek mınıstri

ASTANA. QazAqparat – Qazaqstanda kedeılik deńgeıi byltyrǵa qaraǵanda kóterile túsken. Atalǵan derekti Eńbek jáne halyqty áleýmettik qorǵaý mınıstri Tamara Dúısenova keltirdi, dep habarlaıdy QazAqparat tilshisi.

«Byltyr elimizde kedeıler úlesi 4,9% bolsa, bıyl 5,1%-ǵa jetti. Demek, kedeıler sany artqan. Joǵary ınflıatsııa azamattardyń tabysyna aıtarlyqtaı áser etti. Tapqan tabystyń deni (60-70%) azyq-túlikke jumsalady. Nátıjesinde otbasyny odan ári damytýǵa qarjy jetpeıdi. Árıne, kúnkóris deńgeıiniń azaıa túsýi ár otbasyǵa áser etedi», - deıdi Tamara Dúısenova Ortalyq kommýnıkatsııalar qyzmeti alańynda ótken baspasóz máslıhatynda.

Odan ári mınıstr qandastardy qoldaýǵa qatysty oıyn ortaǵa saldy.

«Álemde etnıkalyq ımmıgratsııamen aınalysatyn tórt el bar, sonyń biri – Qazaqstan. Bizden bólek, Izraıl, Polsha jáne Germanııa. Etnıkalyq qandastarǵa arnalǵan jobany ázirleý barysynda atalǵan elderdiń tájirıbesi eskerildi. Oǵan sáıkes ózge elden kelgen qandastardy Otanyna beıimdeý maqsatynda túrli áleýmettik qoldaý, kómek kórsetiledi, ıaǵnı turǵyn úı jáne eńbekpen qamtý degen sekildi. Bizdiń qandastarymyzǵa usynatyn áleýmettik kómegimiz kóp te, az da emes. Olardyń Otanyna beıimdelýi úshin kórsetiletin alǵashqy kómek deýge bolday», - deıdi vedomstvo basshysy.