Qazaqstanda keden túsimderi artyp keledi

NUR-SULTAN. QazAqparat - Qazaqstanda bıýdjetke keden túsimderi artyp kele jatyr. Bul týraly QR Qarjy mınıstrligi Memlekettik kirister komıteti tóraǵasynyń orynbasary Ómirzaq Beıispekov aıtty, dep habarlaıdy QazAqparat tilshisi.

«Ósim qarqyny joǵary, eselenip arta túskeni baıqalady. Tolyqtaı alǵanda, tsıfrlandyrý barlyq protsesterge adamı faktorlardyń yqpalyn tómendetýge múmkindik beredi jáne sonyń arqasynda biz ımporttaýshylardyń shamamen 60 paıyz deklaratsııasyn kórmeımiz. Sebebi olar «jasyl dáliz» arqyly avtomatty rejimde ótedi. Al eksporttyń 90 paıyzdan astamy avtomatty rejimde júrgiziledi», - dedi ol Erkin ekonomıkalyq aımaqtar boıynsha Dúnıejúzilik keden uıymynyń óńirlik forýmy aıasynda BAQ ókilderine bergen suhbatynda.

Osy rette komıtet tóraǵasynyń orynbasary tsıfrlandyrýdyń arqasynda bıýdjetke keden túsimderiniń arta túskenin aıtty.

«Syrtqy ekonomıkalyq qyzmetke qatysýshylardyń adamdarmen eshqandaı baılanysy bolmaıdy. Munyń barlyǵy - tsıfrlandyrýdyń, jańa tehnologııalar engizýdiń, protsesterdi avtomattandyrýdyń arqasy. Kedendik túsimder boıynsha óte úlken ilgerileý bar. Tipti jekelegen pozıtsııalarda túsimderdiń 12 ese artqany baıqalady», - dedi Ó.Beıispekov.

Aıta keteıik, úsh kúnge sozylatyn forýmǵa 30-dan astam elden, Dúnıejúzilik keden uıymy, AQSh Halyqaralyq damý agenttigi, Eýropalyq komıssııa, múddeli memlekettik organdardyń ókilderi qatysyp jatyr.