Qazaqstanda qazir 300 myńǵa jýyq Reseı azamaty júr

ASTANA. QazAqparat – QR Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov Qazaqstan aýmaǵynda júrgen reseılikter týraly málimet berdi, dep habarlaıdy QazAqparat tilshisi.

«Jyl basynan beri Qazaqstanǵa úsh mıllıonǵa jýyq reseılik keldi, el aýmaǵynan shyqqandar sany da shamamen birdeı boldy. Reseıde ishinara mobılızatsııa jarııalanǵaly elimizge 837 myń reseılik keldi, 780 myń adam qaıta ketti. Qazirgi ýaqytta elimizde 298 myń reseılik bar, onyń 30 myńy eńbek bırjasynda tirkelgen sharttarǵa sáıkes jumys isteıdi», - dedi Іlııas Ispanov ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, olar ýaqytsha turý úshin tirkeýden ótken.

«Qazaqstanda bilim alyp jatqan 20 myńǵa jýyq stýdent bar, sondaı-aq bizge kelip, tranzıtpen ushatyn adamdar bar. 21 qyrkúıekten bastap 198 myń reseılik elimizdi tranzıttik el retinde paıdalandy jáne olar josparlaǵan elge ketti», - dep tolyqtyrdy І. Ispanov.