Qazaqstanda «Qazaqanımatsııa» shyǵarmashylyq birlestigi quryldy

ALMATY. QazAqparat - 28 qazanda Halyqaralyq anımatsııa kúni atap ótiledi. Sondaı-aq, bıyl qazaqstandyq anımatsııaǵa 55 jyl tolyp otyr. Osyǵan oraı, Sháken Aımanov atyndaǵy «Qazaqfılm» kınostýdııasynda «Qazaqanımatsııa» shyǵarmashylyq birlestiginiń resmı ashylý saltanaty ótti, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.

Saltanatty sharaǵa qazaq kınosynyń ańyzy Asanáli Áshimov, otandyq anımatsııa ardagerleri Tamara Muqanova, Ernst Bııseıtov, Gúlmıra Sadyqova, Galına Dýsenko, Abaı Toqshabaev, basqa da mádenıet qaıratkerleri qatysty.

«Birinshi kezekte, barshańyzdy qazaq anımatsııasynyń 55 jyldyǵymen shyn júrekten quttyqtaǵym keledi. Bul mereıtoıda ortaq isimizge úles qosqan qazaq anımatsııasynyń ardagerleri men izbasarlaryna sheksiz alǵysymyzdy bildirgimiz keledi. Olar ondaǵan jyldar boıy tynymsyz eńbek etip, táýelsiz Qazaqstanda anımatsııalyq salanyń qaıta jandanýyn armandady», - dedi «Qazaqanımatsııa» ShB basshysy Jánibek Orazaly quttyqtaý sózinde.

«Qazaqfılm» kınostýdııasynyń málimetinshe, 55 jyl ishinde eki júzge jýyq mýltfılm túsirilip, otyzdan asa anımatsııalyq stýdııalar ómirge keldi.

«2018 jyly anımatsııalyq kınostýdııalar qaýymdastyǵy qurylyp, óz kezeginde bul qaýymdastyq rýhanı-mádenı mańyzy bar kóptegen is sharalar atqarýda. Sonyń ishinde jyl saıyn uıymdastyrylatyn Halyqaralyq Amen animation film festival aıryqsha atap ótýge bolady. Aldaǵy jyly Qazaq anımatsııalyq kıno óneriniń atasy Ámen Qaıdardyń týǵanyna bir ǵasyr ıaǵnı 100 jyl tolmaq. Sonyń aıǵaǵyndaı osynaý ǵasyrlyq mereıtoı qarsańynda «Qazaqanımatsııa» shyǵarmashylyq birlestiginde Ulttyq kınony qoldaý memlekettik ortalyǵynyń tapsyrysymen «Ámen aǵanyń báıteregi» atty qysqametrajdy mýltfılm túsirilý ústinde»,- dep habarlady kınostýdııada.

Sondaı-aq «Qazaqanımatsııa» birlestiginiń jumysy bastalǵaly úsh aı ishinde anımatsııa salasyndaǵy álemniń jetekshi mamandarymen sheberlik synyptary ótken.

«Búgingi tańda «Qazaqanımatsııa» konkýrstyq negizde respýblıkanyń iri qalalarynan málimdelgen 167 stsenarıı ishinen úzdik 20 stsenarıı tańdap aldy. 5 mınýttyq anımatsııalyq kartınalardan turatyn 20 pılottyq jobany jeltoqsan aıynyń sońyna deıin aıaqtaý josparda tur. Osy bastamalar arqasynda anımatsııa salasyndaǵy jas talanttardy jumyspen qamtamasyz etý múmkindigi paıda boldy. Qarasha aıynda otandyq anımatsııa salasyndaǵy mamandar biliktiligin arttyrý úshin Túrkııa, Frantsııa, Polsha jáne Ispanııanyń beldi sheteldik stýdııalaryna barady», - delinedi baspasóz habarlamada.

Eske salsaq, QR mádenıet jáne sport mınıstri Dáýren Abaev Qazaqstanda «Qazaqanımatsııa» shyǵarmashylyq birlestigi qurylatyny týraly málimdegen bolatyn.