Qazaqstanda qazaq halqy bolmasa, Qazaqstan memleketi de bolmas edi - jazýshy Smaǵul Elýbaı

ALMATY. Shildeniń 22-si. QazAqparat /Erlik Erjanuly/ - Qazaqstanyń el birligi doktrınasy óziniń úlken tarıhı, saıası, mádenı jemisin beredi. Bul týraly búgin Almatyda ótip jatqan "Qazaqstannyń el birligi doktrınasy - halyqtyń birliginiń negizi" dep atalatyn dóńgelek ústel jıynynda aıtyldy,

dep habarlaıdy QazAqparat.

"Doktrınanyń jalpyulttyq talqylaýǵa túsýi nátıjesinde biz jalpyultqa unaıtyn, jalpyulttyq múddeni bildiretin, jalpyulttyq ıdeıany bildiretin, jalpyulttyq strategııany bildiretin doktrınany qabyl aldyq. Bul sózsiz óte qajetti qujat edi. Bul doktrına úlken tarıhı, saıası, mádenı jemis beredi dep oılaımyn. Bul úshin sony týdyrǵan Qazaqstan halqy jumyla jumys isteýimiz kerek dep bilemin", deıdi Qazaqstan jazýshylar odaǵynyń múshesi Smaǵul Elýbaı. Doktrına jobasyn ázirlegen jumys toby múshesiniń aıtýynsha, eń alǵashqy nusqada ártúrli pikir týdyrǵan baptar boldy. Onyń keıbir baptary Qazaqstandaǵy qazirgi ult patrıottaryna unamady. Sondyqtan da bizdiń bılik bul máselege obektıvti qarady. Qazaqstanda turyp qazaq degen ulystyń kóńil-kúıin esepke almaý bul óte qaýipti jaǵdaı bolar edi. Óıtkeni Qazaqstanda qazaq halqy 300 jylǵa jýyq otarlyq saıasatty bastan keshti. Qazaq halqy 70 jyl boıy tili qazaq jerinde turyp quryp ketýge jaqyn qalǵan halyq boldy.

"Qazaqstanda qazaq halqy bolmasa Qazaqstan memleketi de bolmas edi. Endeshe Qazaqstan memleketinde qazaq tiliniń bundaı keleńsiz múshkil halge jetýi bárimiz úshin de tarıhı ádiletsizdik bolǵan bolar edi. Eger tarıhı ádilettilikti ornatqymyz kelse, biz Qazaqstanda qazaq tiliniń memlekettik mártebesin qalpyna keltirýimiz kerek edi. Sonda ǵana bul memlekette ulttyq uıysý, ulttyq garmonııa sózsiz bolady. Egerde Qazaqstanda qazaq tili memlekettik til retinde kemshilik kóretin bolsa, qorlyq kóretin bolsa, ony biz mensinbeıtin bolsaq oǵan qolymyz jetpeıdi. Tipti keshegi sovettik ıdeologııada tárbıelengen, óz tiline joǵarydan qaraýǵa tárbıelengen qazaqtardyń, ásirese qalada turatyn qazaqtardyń deni qazaq tilin mensinbeıtin jaǵdaıǵa keldi", deıdi Smaǵul Elýbaı. Áıgili jazýshynyń sózine qaraǵanda, Qazaqstandaǵy qazaq ult patrıottarynyń aıǵaıy, oıbaıy eshqashan ózge ult ókilderine baǵyttalǵan emes. Ol tek qana qazaq tilin mensinbeıtin qazaqtarǵa baǵyttalǵan. Sony túsinbeıtin sheneýnikterge qarsy baǵyttalǵan. Qazaq tilin mensinbeıtin qazaqtar keshegi sovetik ıdeologııadan qalǵan óte qaýipti qubylys. Ol ulttyń boıyndaǵy kesel, aýrý, sol aýrýdan qazaq halqy jazylmaı Qazaqstanda tynyshtyq bolmaıdy. Sondyqtan ult patrıottarynyń armany aldymen qazaq halqyn saýyqtyrý, rýhanı saýyqtyrý. Sonda rýhanı, saıası, deni saý memleket bolady.