Qazaqstanda «Qaıyrymdy kórshige raqmet!» aktsııasy bastaldy
«2016 jyly Elbasynyń jarlyǵymen Alǵys aıtý kúni belgilendi. Atalǵan mereke osymen úshinshi ret atalyp otyr. Bul kúni Qazaqstan xalqy Assambleıasynyń usynysymen jyl saıyn belgili bir aktsııa bastaý alady. Búgin de jaqsy bir aktsııa dúnıege keldi. Assambleıanyń usynysymen «Qaıyrymdy kórshige raqmet!» degen aktsııa bastalady. Qazaqta aıtady ǵoı, «týysy jaqyn jaqyn emes, kórshisi jaqyn jaqyn». Sondyqtan osy aktsııa barysynda árbir kóshede, árbir qalada, árbir aýylda qoldaýdy qajet etetin azamattarǵa Assambleıa bolyp, xalyq bolyp, kórshi bolyp, kómek kórsetemiz dep oılaımyn», - dedi G.Ábdixalyqova Alǵys aıtý kúnine arnalǵan merekelik sharada.
Memlekettik xatshy atalǵan aktsııanyń Qazaqstandaǵy barlyq ult pen ulystardyń birligin kúsheıtetinine senim bildirdi. «Jaqynymyzǵa ıgilikti ispen, jaqsy sózben qoldaý bildireıik. Osy aktsııa aıasynda kásiporyndar men uıymdar qarttar úıi, balalar úıi jáne taǵy basqa mekemelerge qoldaý kórsetedi dep senemiz. Alǵys aıtý kúni Naýryz merekesi sııaqty jalpyulttyq merekege aınalsyn», - dep atap kórsetti G.Ábdixalyqova.