Qazaqstanda qaıta óńdeý salasyna ınvestıtsııa kólemi 42% ósti

ALMATY. QazAqparat - Qazaqstanda qaıta óńdeý salasyna salynǵan ınvestıtsııa kólemi bir jylda 42% artty, dep habarlaıdy QazAqparat tilshisi Energyprom-ǵa silteme jasap. 

Portalda jarııalanǵan málimetterge sáıkes, búkil ónerkásip sektorynyń ınvestıtsııalyq qorjynyndaǵy óńdeý ónerkásibiniń salmaǵy 20%-ǵa jýyqtaǵan. Qaıta óńdeý sektoryna 8 aıdyń ishinde 745,9 mlrd teńge ınvestıtsııa salynǵan. Bul kórsetkish byltyrǵymen salystyrǵanda 41,8%, (al salystyrmaly baǵalar boıynsha - 29,7%) artyq.

Kapıtaldyq salymdardyń 44,2%-y jazda Qazaqstannyń respýblıkalyq mańyzy bar úshinshi qalasyna aınalǵan Shymkent qalasynyń úlesine týra keledi.

Qaıta óńdeý sektoryna ınvestıtsııa tartý boıynsha kóshbasshylar qatarynda Qaraǵandy (9,9%) jáne Atyraý (7,5%) oblystary da bar.

Sektorda ınvestıtsııalar kóleminiń artýynan tys, qaıta óńdeý salasynyń eldegi jalpy kapıtaldyq salymdar kólemindegi úlesi de artyp keledi. Jıyntyq ınvestıtsııalyq qorjyndaǵy qaıta óńdeý salasynyń salmaǵy ústimizdegi jyldyń qańtar-tamyz aılarynda 11,7%-dy qurady. Byltyr bul kórsetkish 11% bolsa, memlekettik baǵdarlamalar aıasynda ındýstrıaldyq-ınnovatsııalyq belsendi damýǵa deıingi 2010 jyly 7,5% aınalasynda ǵana bolatyn.

Jalpy, ústimizdegi jyly ónerkásip sektoryna kapıtaldyq salymdar úlesi byltyrǵymen shamalas - 19,4%. Sonymen qatar, qaıta óńdeý segmentin belsendi damytýǵa deıingi 2010 jyly bul kórsetkish nebári 13,3% deńgeıinde edi.

Qaıta óńdeý ónerkásibiniń basty ınvestıtsııalyq magnıtteri - benzın jáne dızel, sondaı-aq munaıdy qaıta óńdeýden alynǵan basqa da ónimder men koks óndirý (kapıtaldyq salymdardyń 49,8%-y), metallýrgııa (20,4%) jáne azyq-túlik ónerkásibi (11,2%) bolyp otyr.

Osy úsh ınvestıtsııalyq tartymdy sala sektorǵa salynǵan jalpy kapıtaldyń 80%-yn qamtıdy.