Qazaqstanda qaı salyqtar qysqaratyny belgili boldy

NUR-SULTAN. QazAqparat – QR Ulttyq ekonomıka mınıstri Rýslan Dálenov qaı salyqtardy ońtaılandyrý josparlanyp otyrǵanyn aıtty, dep habarlaıdy QazAqparat tilshisi.

«Eki salyqty bir tólemge biriktirý men bir salyqty joıý boıynsha usynystar daıarlanǵan. Jeke adamdardyń múlik jáne jer salyǵyn biriktirý eskerilgen. Bul óz kezeginde túbirtek toltyrý, bank komıssııasy sekildi shyǵyndardy qysqartady», - dedi mınıstr Úkimet úıindegi baspasóz máslıhatynda.

Sonymen qatar, kóppáterli turǵyn úılerdiń ıeleri úshin jer salyǵyn alyp tastaý usynylady.

«Osy oraıda bul qadamdar 3 mln salyq tóleýshige qatysty bolady. Munymen qosa, jańa usynystar bólek qaralady, ıaǵnı eńbekaqy tóleý qorynan salyqty ustap qalý baǵyty pysyqtalady. Osy oraıda bir tólemge biriktirýdi qarastyrýǵa bolady, bul qadam shaǵyn orta bıznes úshin tólem jasaýdy aıtarlyqtaı jeńildetedi. Sonymen qatar, túrli tólemder men alymdardy ońtaılandyrýǵa bolady», - dedi R. Dálenov.

Onyń aıtýynsha, atalǵan qadamdardy iske asyrý turǵysynda daıyn usynystar 2021 jyly engiziledi dep josparlanǵan. Al talqylaýdaǵy qalǵan bastamalardy tájirıbe júzinde engizý 2022 jyldan bastalady.