Qazaqstanda qaýipti aýrý túrleri enip ketpes úshin ne istelip jatyr
«Qazaqstan aýmaǵyna juqpaly aýrýlardyń taralýynyń aldyn alý maqsatynda profılaktıkalyq jáne indetke qarsy is-sharalar atqarylyp jatyr. Áýejaılar men shekara ótkelderin qosa alǵanda, sanıtarııalyq-karantındik pýnktterde baqylaý jumystary kúsheıtildi. Maımyl sheshegi tirkelgen elderden kelgen azamattarǵa nazar aýdarylady. Infektsııanyń taralýyn boldyrmaý úshin Densaýlyq saqtaý mınıstrligi maımyl sheshegi boıynsha endemııalyq elderge saparlaýdy josparlap otyrǵan azamattardy saqtyq sharalaryn saqtaýǵa shaqyrady», - delingen vedomstvonyń Kazinform agenttigine bergen jaýabynda.
QR Bas memlekettik sanıtarııalyq dárigeriniń 2024 jylǵy 16 tamyzdaǵy «Tumaý, jedel respıratorlyq vırýstyq ınfektsııalar jáne koronavırýs ınfektsııasy boıynsha 2024-2025 jyldardyń epıdemııalyq maýsymyna arnalǵan sanıtarııalyq-profılaktıkalyq, sanıtarııalyq-epıdemııaǵa qarsy is-sharalar júrgizý týraly» qaýlysyna saı medıtsınalyq uıymdarda qyzmetkerlerdiń maska taǵý rejımi engizildi.
Komıtet málimetinshe, Qazaqstanda adamdardyń qus tumaýy aýrýyn juqtyrý jaǵdaıy 2009 jyldan beri tirkelgen joq. Shet elden kelgen azamattarǵa mindetti termometrııa ótkizý turǵysynda shekaradaǵy sanıtarııalyq-karantındik baqylaý pýnkti táýlik boıy iske asyryp jatyr.
«Qazaqstanda maımyl shesheginiń birde-bir jaǵdaıy tirkelgen joq. Densaýlyq saqtaý mınıstrligi ınfektsııa elimizge enip ketpes úshin tıisti sharalardy qabyldady. Bul indetpen kúreste bilikti mamandar jetkilikti. Aýrýdyń taralýyna jol bermeý maqsatynda medıtsınalyq, zerthanalyq qyzmettiń jáne basqa da jumyldyrylǵan qyzmetterdiń daıyndyǵyna monıtorıng júrgiziledi», - dep atalyp ótken Sanıtarııalyq-epıdemıologııalyq baqylaý komıteti aqparatynda.
Jaqynda Premer-Mınıstr Oljas Bektenov maımyl sheshegine qatysty áýejaılarda baqylaý jumystaryn kúsheıtýdi tapsyrdy.