Qazaqstanda qaýipti ónimdi jedel anyqtaıtyn ınstıtýt engizilýde

NUR-SULTAN. QazAqparat – Elimizde sertıfıkattalmaǵan ónimdi tolyq baqylaýǵa alý múmkindigi jasalady. Bul týraly Parlament Májilisiniń jalpy otyrysynda «Tehnıkalyq retteý týraly» zańynyń jobasyn birinshi oqylymda talqylaý kezinde QR Saýda jáne ıntegratsııa mınıstri Baqyt Sultanov málim etti, dep habarlaıdy QazAqparat tilshisi.

«Zań jobasynyń negizgi erejelerin qysqasha atap ótýge ruqsat etińizder.

Birinshiden, ishki naryqty «tazartý» eskerilgen. Bul máseledegi zańnamalyq jańalyǵy – sýbektilerdiń baqylaýynan obektilerdiń baqylaýyna kóshý. ıAǵnı óndirýshi nemese satýshy emes, ónimniń ózi tekseriletin bolady. Ol úshin zerthanalarda synaq júrgizý úshin adam ómirine qaýipti ónim úlgilerin satyp alý rásimderi engiziledi. Synaq nátıjelerimen dáleldengen qaýipti ónimdi ńaryqtyń aınalymynan jedel túrde shyǵaryp alý maqsatynda naryqty qadaǵalaý ınstıtýty engizilýde. Bul jappaı baqylaýdy bildirmeıdi. Obektiler aqparattyq bazada «onlaın» rejımde qadaǵalanatyn bolady, al tekserýler tek «anyqtaý - synaý – naryqtan alý» shemasy boıynsha júzege asyrylady», - dedi mınıstr.

Ekinshiden, sáıkestikti baǵalaý rásimderin jetildirý, sertıfıkattaý jáne akkredıtteý protsesterin tsıfrlandyrý qaralǵan.

«Ol úshin elektrondyq sertıfıkattarǵa kóshý, keıinnen Eýrazııalyq ekonomıkalyq komıssııanyń ortaq protsesterimen ıntegratsııalaý qarastyrylǵan. Sáıkestikti baǵalaýǵa óndirýshi, óndirýshiniń ýákiletti tulǵasy, ımporttaýshy, satýshy degen ótinish berýishilerdiń naqty tizimi bekitiledi. Sertıfıkat «ıesiniń» jáne «paıdalanýshysynyń» quqyǵy týraly maǵynasy engiziledi. Synaq protsesiniń foto-beıne tirkeý mehanızmi kózdeledi jáne synaq bazasynyń bolýyna qoıylatyn talaptar belgilenedi.

Atalǵan sharalardy qabyldaý nátıjesinde sertıfıkattaý kezinde synaq nátıjeleriniń durystyǵyn 100 paıyzǵa deıin jetkizý kútilýde jáne sertıfıkattalmaǵan ónimdi tolyq baqylaýǵa alý múmkindik beriledi», - dedi B. Sultanov.