Qazaqstanda kásiptik patologııasy bar 8 myńnan astam adam tirkelgen

ASTANA. QazAqparat – Qazaqstanda kásiptik patologııasy bar 8 myńnan astam adam tirkelgen. Osy oraıda, Qaraǵandy medıtsına ýnıversıteti qoǵamdyq densaýlyq saqtaý ınstıtýtynyń bólimshe meńgerýshisi Sáýle Aqynjanova kásiptik medıtsınany jandandyrý qajettigin aıtady, dep habarlaıdy QazAqparat QRKF medıaortalyǵyna silteme jasap.

Spıkerdiń aıtýynsha, Qazaqstanda kásiptik patologııasy bar 8 168 adam tirkelgen. Al, qaýipti eńbek jaǵdaılarynda jumys isteıtin jumyskerlerdiń eń kóp sany Qaraǵandy oblysynda – 42%, Pavlodar oblysynda – 43%, Mańǵystaý oblysynda – 38%, Shyǵys Qazaqstan oblysynda – 26,9%, Jambyl oblysynda – 26,4%.

Kásiptik aýrýlardyń eń joǵary kórsetkishteri «Qazaqmys Korporatsııasy» JShS, «ArselorMıttal Temirtaý» AQ, «Vostoktsvetmet» JShS, «Qaztsınk» JShS, «Qazfosfat» JShS JF kásiporyndarynda baıqalady.

Jumyskerlerdiń 30,2% ekiden kóp aýrýmen aýyrady, bul zııandy faktorlar kesheniniń jumyskerler aǵzasyna áser etýimen baılanysty, bir naýqasqa eki, úsh jáne odan da kóp dıagnoz qoıylady.

«2021-2022 j.j. respýblıkada kásiptik aýrýshańdyqtyń artýy baıqaldy. Tirkelgen kásiptik aýrýshańdyq deńgeıi naqty jaǵdaıdy kórsetpeıtini jáne qazirgi Qazaqstandaǵy eńbek jaǵdaılarynyń sharttaryna sáıkes kelmeıtini anyq», - dedi Sáýle Aqynjanova Kásipodaqtar federatsııasy uıymdastyrǵan «Qaýipsiz jumys orny – ómir men densaýlyqty saqtaýdyń negizi» atty dóńgelek ústel barysynda.

Ol kásiptik medıtsına men kásiptik patologııa qyzmetin úılestiretin uıym – Gıgıena jáne kásiptik aýrýlar ulttyq ortalyǵyn qalpyna keltirýdi jedeldetý, sondaı-aq, elimizdiń aımaqtarynda kásiptik medıtsınany jandandyrý qajet dep sanaıdy.

Buǵan deıin Eńbek jáne halyqty áleýmettik qorǵaý mınıstrligi málim etkendeı, Qazaqstanda jyl saıyn kásiporyndarda 1500-den astam jazataıym oqıǵaǵa jol beriledi, onyń 200-ge jýyǵy ólimmen aıaqtalady.