Qazaqstanda kásipodaq ınstıtýttary jańǵyrtylady
«Kásipodaqtar týraly jańa zań Qazaqstandaǵy kásipodaq qozǵalysyna jańa serpin beredi, sóıtip, ol is júzinde jumysshylardyń múddelerin qorǵap, memleket pen bıznes ókilderiniń áleýmettik seriktesi bola alady», - dedi S.Myńbaev.
QR KF tóraǵasy orynbasarynyń aıtýynsha, kásipodaqtar týraly jańa zańnyń qabyldanýy - respýblıkadaǵy kásipodaqtar qozǵalysyn jandandyrýdyń qajetti sharasy bolyp tabylady.
Sonymen qatar, Sársenbaı Myńbaev kásipodaq federatsııasynyń zańdy qaraıtyn jumys tobynyń nazaryna usynatyn birneshe usynystaryn jarııa etti. Olardyń negizgisi kásipodaqtar birlestikteriniń róli men mindetterin naqty aıqyndaý máselesi.
«Biz bul zańda kásipodaqtardyń qoǵamdaǵy róli men orny, onyń ishinde eńbek daýlary men talastaryn retteýdegi róli naqty anyqtalady dep oılaımyz. Sondaı-aq kásipodaqtardyń quqyqtary men mindetteri, olardyń jumysshylardyń áleýmettik-ekonomıkalyq quqyqtaryn retteýdegi jaýapkershiligi naqty kórsetiletin bolady dep oılaımyz», - dep atap ótti QR kásipodaqtar federatsııasy tóraǵasynyń orynbasary.
Elbasy óziniń baǵdarlamalyq maqalasynda kásipodaq ınstıtýttaryn jańǵyrtý qajettiligi týraly atap kórsetken bolatyn. S.Myńbaev ta óz suhbatynda kásipodaq qozǵalysyn jańǵyrtý eńbek qatynastary máselelerin ortalyqtandyrylǵan túrde sheshýge múmkindik beretinin aıtyp ótti.
QR kásipodaqtar federatsııasy tóraǵasynyń orynbasary sondaı-aq, ekinshi tarap retinde kásipodaq qol qoıatyn ujymdyq kelisimder jasaý qajettigin basa aıtty. Bul atalǵan kelisimderdiń tıimdiligin arttyrady.
«Kásipodaq birlestikteri týraly» zańda kásipodaqtar men jumysshylardyń jaýapkershilikteri, sondaı-aq kásipodaqtyń ujymdyq kelisimder arqyly jumysshy quqyǵyn qorǵaı alatyndyǵy kórsetilýi qajet. Bizdiń oıymyzsha, bul respýblıkalyq, óńirlik, salalyq jáne kásiporyndyq deńgeıde atqarýshy organdar men jumys berýshiler jáne jumysshylar úshin naqty jazylýy qajet», - dep qortyndylady sózin Sársenbaı Myńbaev.
Esterińizge sala keteıik, Memleket basshysynyń «Qazaqstandy áleýmettik jańǵyrtý: Jalpyǵa Ortaq Eńbek Qoǵamyna qaraı 20 qadam» maqalasynda kórsetilgen tapsyrmalaryna sáıkes, Eńbek jáne halyqty áleýmettik qorǵaý mınıstrligi kásiptik odaqtar týraly zańnamalarǵa taldaý jasaýda. Jyl sońyna deıin atqaratyn qyzmet túrine qaraı kásipodaq qurýǵa, kásipodaqtardyń quqyqtary men mindetterin naqtylaýǵa, bastaýysh jáne salalyq kásipodaqtar uıymdarynyń áreket deńgeıi men qyzmetterine jasalatyn shekteýler men retteýlerge baǵyttalǵan ózgerister týraly Tujyrymdama usynylatyn bolady.