Qazaqstanda kásibı sport klýbtaryna bólinetin qarajat balalar sportyna baǵyttalmaq
«Memleket basshysy halyqqa Joldaýyn iske asyrý jónindegi Jalpyulttyq is-sharalar josparynda Mádenıet jáne sport mınıstrliginiń aldyna halyqty, onyń ishinde eń aldymen balalardy dene shynyqtyrýmen jáne buqaralyq sportpen aınalysýǵa belsendi tartý, sondaı-aq sport sektsııalaryn ashý jáne «balalar úıirmeleriniń» qyzmetin qalpyna keltirý mindeti qoıyldy», - dedi Aqtoty Raıymqulova OKQ-da ótken baspasóz máslıhatynda.
Onyń aıtýynsha osy mindetterdi júzege asyrý maqsatynda Jalpyulttyq is-sharalar jospary sheńberinde Mádenıet jáne sport mınıstrligi jergilikti atqarýshy organdarmen birlesip, is sharalardy iske asyrýda. Atap aıtqanda ol sharalar boıynsha kásibı sport klýbtaryn ustaýǵa jiberiletin qarajatty halyqty, eń aldymen balalardy dene shynyqtyrýmen jáne buqaralyq sportpen aınalysýǵa tartýǵa qaıta baǵdarlaý kózdelýde. Sondaı-aq barlyq oblysta, respýblıkalyq mańyzy bar qalada jáne astanada, iri aýdan ortalyqtarynda sport sektsııalaryn ashý jáne «balalar úıirmeleriniń» qyzmetin qalpyna keltirý josparlanǵan.
«Joldaýda Memleket basshysy tarapynan qarjy tapshylyǵy kezinde memleket bıýdjeti esebinen kásibı sport klýbtaryn tolyqtaı qamtamasyz etýdiń qajeti joqtyǵy syn retinde aıtyldy. Búgingi kúni respýblıka boıynsha 36 myńnan astam adam jattyǵatyn 97 birlik kásibı sport klýby bar. Otandyq kásibı sport klýbtarynyń kópshiligi jergilikti bıýdjet esebinen jumys isteıdi. Olardyń keıbirine ulttyq kompanııalar nemese jeke menshik ıeleri qoldaý kórsetedi», - dedi ol.