Qazaqstanda kásibı baǵyt berý ortalyqtary qurylady

NUR-SULTAN. QazAqparat - QR Premer mınıstriniń birinshi orynbasary Álıhan Smaılov oqýshylar men stýdentter arasynda barlyq deńgeıdegi bilim berý jelileri arqyly kásibı baǵyt berý jumysyn kúsheıtýge qatysty depýtat saýalyna jaýap berdi, dep habarlaıdy QazAqparat.

«Qazaqstan Respýblıkasynda bilim men ǵylymdy damytýdyń 2020-2025 jyldarǵa arnalǵan memlekettik baǵdarlamasynda kásibı baǵyt berý qyzmetin biryńǵaılandyrý sharalary qarastyrylǵan. Onyń ishinde mamandardy daıyndaý men kásibı bilim berýdi ınternatsıonaldandyrý úderisine jumysshylardy tartý da bar», - dedi Á. Smaılov.

Qarastyrylǵan sharalardyń qatarynda, oqýshylarǵa erte jastan kásibı baǵyt berý, sonymen qatar mamandyqtardy dáripteý boıynsha keń aýqymdy jumys jasaý bar. Odan bólek, memlekettik baǵdarlamada «mektep-kolledj» keshenin qurý boıynsha jumystardy jalǵastyrý josparlanǵan.

«Sondaı-aq, memlekettik baǵdarlama aıasynda ekonomıkaǵa qajetti kadrlardy daıyndaýda seriktesterdiń qatysýyn arttyrý maqsatynda elimizde mansap jáne kásibı baǵyt berý ortalyqtaryn qurý qarastyrylǵan. Sol sekildi túlekterge mamandyq tańdaýda kómekshi qural retinde «Kásip navıgatory» atty mobıldi qosymshasyn ázirleý jospary da bar. Jáne atalǵan ortalyqtar jas mamandardy jumyspen qamtý men mamandardyń kásibı baǵytta damýyna birlesip áreket etedi», - deıdi Úkimet basshysynyń orynbasary óz jaýabynda.