Qazaqstanda kartop pen sábiz baǵasy arzandady - mınıstrlik

NUR-SULTAN. QazAqparat – Sońǵy eki aptada áleýmettik mańyzy bar azyq-túlik taýarlarynyń baǵasy 0,5 paıyzǵa tómendedi. Bul týraly búgin Úkimet otyrysynda QR Saýda jáne ıntegratsııa vıtse-mınıstri Erjan Qazanbaev málim etti, dep habarlaıdy QazAqparat tilshisi.

«Jyl basynan beri áleýmettik mańyzy bar azyq-túlik taýarlarynyń baǵasy 9,9 paıyzǵa ósti. Іshki naryqta otandyq ónimderdiń kóbeıýi esebinen sońǵy eki aptada baǵalar 0,5 paıyzǵa tómendedi. Atap aıtqanda, eń joǵary ósý sátinen bastap kartop baǵasy 34 paıyzǵa nemese 71 teńgege, al sábiz 41 paıyzǵa nemese 122 teńgege tómendedi. Sonymen qatar, sońǵy aptalarda qyryqqabat 0,4 paıyzǵa, pııaz 0,1 paıyzǵa arzandady», - dedi E. Qazanbaev.

Onyń aıtýynsha, baǵanyń eń joǵary ósimi 11,6% Túrkistan oblysynda, 11,3% – Qyzylorda oblysynda jáne 11,3% – Qostanaı oblysynda tirkeldi. Eń tómen ósim 9,5% Almaty qalasynda, 9,6% –Almaty oblysynda jáne 9,7% Qaraǵandy oblysynda belgilendi.

Budan buryn habarlanǵandaı, búgin Úkimet otyrysynda elimizde baǵanyń ósýin tejeý maqsatynda 2021 - 2024 jyldarǵa arnalǵan ınflıatsııaǵa qarsy áreket etý sharalary kesheniniń jobasy qaralyp, maquldandy.