Qazaqstanda káriz-tazartý júıelerin salýǵa arab kompanııasy tartylmaq
Atalǵan is-sharaǵa «Qazaqstandyq turǵyn úı-kommýnaldyq sharýashylyqty jańǵyrtý jáne damytý ortalyǵy» AQ basqarma tóraǵasy Ádilhan Ómirbaev jáne Abu Dhabi Sewerage Services Company-diń basqarýshy dırektory, sondaı-aq basqarma tóraǵasy Ahmed al-Shamsı qatysty.
Bul oraıda Qazaqstandyq ortalyqtyń ókilderi elimizdegi káriz-tazartý júıelerin salý men jańǵyrtý jobalaryn iske asyrýǵa baǵyttalǵan tujyrymdamasy, sonymen birge qarjylandyrý tetikterin aıtyp berdi. Budan basqa Qazaqstannyń 68 qalasyndaǵy sý burý qurylystary men jelileriniń qazirgi jaǵdaıy jóninde málimet berildi. Osy baǵyttaǵy ózekti máselelerdi júıeli túrde sheshý úshin áleýetti ınvestorlardyń ınfraqurylymdyq jobalarǵa qatysý perspektıvalary talqylandy.
Óz kezeginde sheteldik kompanııanyń ókilderi respýblıkadaǵy káriz-tazartý ınfraqurylymynyń jaǵdaıyn zerttep, taldaýǵa baılanysty óz usynystaryn jetkizdi.
Kezdesýdiń qorytyndysy boıynsha taraptar odan ári ózara tıimdi áriptestikti damytýdyń mańyzdylyǵyn atap ótti.
Osy rette Abu Dhabi Sewerage Services Company – Abý-Dabı Ámirliginde qatty jáne suıyq qaldyqtardan jınalatyn aǵyndy sýlardy qaýipsiz jınap, tazartýmen aınalysatyn memlekettik kommýnaldyq kompanııa ekenin aıta keteıik. Atalǵan kompanııanyń aktıvinde 40-qa jýyq káriz tazartý qondyrǵysy jáne 260-tan astam sorǵylaý stansasy, sondaı-aq 12,606 shaqyrymdaı káriz jelisi bar.