Qazaqstanda qanttyń ortasha baǵasy qansha

NUR-SULTAN. QazAqparat - Saýda jáne ıntegratsııa mınıstrligi Saýda komıtetiniń tóraǵasy Erjan Qazanbaev eldegi qanttyń ortasha baǵasy týraly aıtty, dep habarlaıdy QazAqparat.

«Qantty bastapqy baǵada satyp alý máselesimen aýyl sharýashylyǵy mınıstrligi aınalysady, óıtkeni kvotalardy solar bóledi. Qant ártúrli elderden jetkiziledi, Úndistan, Meksıka, Brazılııadan ákelinetin qant bar. Árqaısysynyń baǵasy ártúrli. Munyń bári biz ákeletin kólemge jáne óndirýshi elge baılanysty. Sondyqtan egjeı-tegjeıli aqparat alý úshin Aýyl sharýashylyǵy mınıstrligine júginý qajet», - dedi brıfıng barysynda jýrnalısterge Saýda Komıtetiniń tóraǵasy.

Sonymen birge, spıker eldegi qant baǵasy týraly aıtyp berdi.

«Baǵa boıynsha biz apta saıyn monıtorıng júrgizip shyǵamyz. Statıstıka kórsetkendeı, kem degende ótken aptada qanttyń ortasha baǵasy 450-470 teńge bolǵan. Degenmen, biz áli resmı derekterdi alǵan joqpyz. Osy aptada jańa statıstıkalyq málimetter alamyz jáne erteń sizderge qosymsha aqparat bere alamyn», - dedi Erjan Qazanbaev.

Buǵan deıin E. Qazanbaev elimizde qant tapshylyǵy joq ekenin aıtqan edi.

«Keıbir saýda jelilerine qant sál kesh túsip, belgili bir aralyqta qant bolmaýy múmkin. Qant tapshylyǵy joq jáne ol bolmaıdy da», - dep túsindirdi komıtet tóraǵasy.