Qazaqstanda qant óndirisi bir jarym esege artady

ASTANA. QazAqparat - Bıyl egis alqaptaryn ártaraptandyrý elimizde qant óndirisin bir jarym esege arttyrýǵa múmkindik beredi. Búgin Úkimette ótken baspasóz máslıhatynda QR Aýyl sharýashylyǵy birinshi vıtse-mınıstri Qaırat Aıtýǵanov osylaı málim etti, dep habarlaıdy QazAqparat.

«2015 jyldyń qorytyndysy boıynsha tek 3 paıyz qant qyzylshasyn óndirdik jáne bul ónim Qazaqstanda sheker óndrisine baǵyttalyp otyrdy. 97 paıyz aq qantty nemese qant quraǵyn alys shetelden tasymaldaıtynbyz. Endi jyl saıyn Almaty jáne Jambyl oblystaryndaǵy egis alqaptary artyp keledi. Eki jyl qatarynan Soltústik Qazaqstan qant qyzylshasyn 400 gektarǵa otyrǵyzýda. Júrgizilgen ártaraptandyrý sharalary bıyldyń ózinde otandyq qanttyń óndirisin 1,4 esege (36 myńnan 51 myń tonnaǵa deıin) arttyrady dep kútilýde»,-dedi Aıtýǵanov.

Budan buryn habarlanǵandaı, jalpy Qazaqstanda qant qajettiligi 500 myń tonnany quraıdy. Qanttyń 90 paıyzy qant quraǵynan óndiriledi jáne ol nóldik bajben ımporttalady. Bul norma elimizde 2019 jylǵa deıin kúshinde bolady. Sáıkesinshe, qanttyń 10 paıyzy qyzylshadan óndiriledi. QR AShM ımporttalatyn shıkizat kólemin tómendetýdi josparlap otyr.