Qazaqstanda qant dıabetine shaldyqqan 439 myń naýqas tegin dárimen qamtalǵan

ASTANA. QazAqparat - Qazaqstanda qant dıabetimen aýyratyn 400 myńnan astam naýqas tegin dári-dármekpen qamtamasyz etiledi. Bul týraly QR Densaýlyq saqtaý mınıstrliginen málim etti, dep habarlaıdy QazAqparat.

14 qarasha – Dúnıejúzilik qant dıabetimen kúres kúni.
Álemde qant dıabetimen aýyratyn eresekterdiń sany sońǵy 20 jylda úsh ese kóbeıdi. Jalpy dúnıejúzinde qant dıabetine 400 mıllıonnan astam adam shaldyqqan.

«Qazaqstan Respýblıkasynda qant dıabetimen aýyratyn naýqastar sanynyń jyl saıyn turaqty artýy baıqalady (qazirgi ýaqytta jalpy sany 400 myńnan astam adam, 2030 jylǵa qaraı kútiletin sany – 800 myńnan astam). Bul patsıentter sanynyń 10 jylda 2,5 esege ulǵaıýynyń jalpy álemdik úrdisin rastaıdy (IDF atlasy, 2019).
Sońǵy 10 jylda eldegi patsıentterdiń sany 2 ese kóbeıdi.

Bıylǵy 1 shildege deıin qant dıabetimen dınamıkalyq baqylaýda 439 327 adam, onyń ishinde 1 tıpti QD dıagnozymen – 26778 adam (21989 eresek jáne 4789 bala) turady. Esepte 2 tıpti QD dıagnozymen-412 549 adam (412 206 eresek jáne 343 bala) turady», - delingen mınıstrlik málimetinde.
Álemde adamdar ınsýlındi alǵash ret 1922 jyly 11 qańtarda qoldandy. Oǵan deıin naýqastar «qant dıabeti» dıagnozyn ólim jazasy retinde qabyldap kelgen edi.
Tegin medıtsınalyq kómektiń kepildik berilgen kólemi sheńberinde 1 jáne 2 tıpti qant dıabeti bar barlyq patsıentter jeńildetilgen dárilik preparattarmen jáne medıtsınalyq buıymdarmen, onyń ishinde ınsýlındermen, test-jolaqtarmen, ınsýlın pompalarymen qamtamasyz etilgen.
Búgingi tańda qant dıabeti – Qazaqstandaǵy eń qymbat áleýmettik mańyzy bar aýrýlardyń biri. 2021 jylǵy naýryz – 2022 jylǵy naýryz aralyǵynda dıspanserlik patsıentterdi ambýlatorııalyq dári-dármekpen qamtamasyz etýge jumsalǵan shyǵyn 29,3 mlrd teńgeni qurady, bul aldyńǵy kezeńmen salystyrǵanda 36% joǵary.
«Qant dıabetin emdeýge arnalǵan densaýlyq saqtaý júıesiniń shyǵyndary úlken.
Eger biz jaqyn arada qant dıabeti problemasyn sheshpesek, bul aýrýdyń profılaktıkasyna ınvestıtsııa salmaıtynymyzdy, bolashaqta bul shyǵyndardyń artatynyn aıta ketken jón», - delingen mınıstrlik málimetinde.
Osy oraıda azamattar óziniń ómir saltyna, tamaqtanýyna, fızıkalyq belsendiligine nazar aýdarǵany mańyzdy. Sondaı-aq jylyna keminde 1 ret qandaǵy qant deńgeıin anyqtap otyrý qajet.