Qazaqstanda qansha turǵyn úı apattyq jaǵdaıda

NUR-SULTAN. QazAqparat – Búgingi kúni elimizde 1,3 myń úı apattyq dep tanyldy. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Turǵyn úı alýdyń ashyqtyǵyn jáne júıeli biryńǵaı esepke alýdy qamtamasyz etý úshin kezekte turǵan adamdardyń biryńǵaı respýblıkalyq bazasy engizilip jatyr. Osy bazanyń aıasynda kezekte turǵan adamdardy túgendeý júrgiziledi jáne olardyń mártebesi, onyń ishinde tabysy aıqyndalady, sondaı-aq menshiginde turǵyn úıdiń bolýy anyqtalady. Qandaı da bir óńirde jalǵa beriletin jáne kredıttik turǵyn úıge qajettilikke taldaý jasalady», - dedi B. Atamqulov Parlament Májilisinde «Nurly jer» baǵdarlamasynyń júzege asyrylýyna arnalǵan Úkimet saǵatynda.

Onyń sózine qaraǵanda, 2018 jyly osy baza arqyly túgendeý júrgizýdiń nátıjesinde 30 myń azamat kezekten alyndy.

«Búgingi kúni ákimdiktermen birlesip túgendeý jáne bazany memlekettik organdardyń aqparattyq bazalarymen ıntegratsııalaý júrgizilip jatyr»,- dedi mınıstr.

Budan bólek vedomstvo basshysy jańa turǵyn úı men ınfraqurylym salýmen qatar, turǵyn úı qoryn jańartý jáne jańǵyrtý jónindegi is-sharalar da qarjylandyrylatynyn jetkizdi.

«Búgingi kúni respýblıkada 1,3 myń úı apattyq dep tanyldy jáne 18 myńnan astam kondomınıým obektisi kúrdeli jóndeýdi talap etedi. Jýyq aradaǵy 2 jyl ishinde 700 úıdi kúrdeli jóndeýge shamamen 30 mlrd teńge bólinetin bolady», - dedi ol.