Qazaqstanda qansha sheteldik JOO fılıaly bar
Ortalyq kommýnıkatsııalar alańynda ótken brıfıngte ǴJBM Joǵary jáne joǵary oqý ornynan keıingi bilim komıtetiniń tóraǵasy Gúlzat Kóbenova elimizde 19 sheteldik joǵary oqý oryndarymen bilim berý baǵdarlamalary júzege asyrylyp jatqanyn aıtty. Al, 8 sheteldik joǵary oqý oryndarymen seriktestik ornatý máselesi pysyqtalyp jatqan kórinedi. Bul fılıaldar jastarǵa, onyń ishinde aýyl jastaryna, halyqaralyq standarttarǵa saı joǵary bilim alýǵa múmkindik bermek.
Onyń aıtýynsha, Aqtóbede Herıot Ýatt ýnıversıtetiniń fılıalynda Qazaqstannyń 9 óńirinen jastar bilim alyp jatyr. Bıyl munda RF Týla oblysynan alǵashqy stýdent oqýǵa túsken.
«Soltústik Qazaqstanda Arızona ýnıversıtetiniń fılıalynda Qazaqstannyń 18 óńirinen jastar bilim alýda. Sondaı-aq, Atyraý oblysynda Gýbkın atyndaǵy ýnıversıteti, Almaty qalasynda MIFI ýnıversıtiniń fılıaldary tabysty jumys istep jatyr. Bul fılıaldar bıyl 3-ret qabyldaýdy júzege asyryp keledi. 2023 jyldan bastap Aqtaýda Esenov ýnıversıtetinde nemis ýnıversıtetteriniń konsortsıýmy arqyly Turaqty ınjınırıng ınstıtýty quryldy. Sonymen qatar, Shyǵys Qazaqstanda Bydgoş qalasynyń Ekonomıka ýnıversıtetiniń fılıaly jáne Qyzylordada Seýlteh ýnıversıtetimen birlesip, Jasandy ıtelllekt joǵary mektebi ashyldy», – dedi Gúlzat Kóbenova.
Aıta keteıik, bıyldan bastap Sátbaev ýnıversıtetinde álemniń júzdigine kiretin Gonkong SityU ýnıversıtetiniń qos dıplom baǵdarlamasy júzege asa bastady. Jaqynda ǵana Qytaı jáne Qazaqstannyń prezıdentteri ashqan Beıjiń til jáne mádenıet ýnıversıteti de jumysyn jalǵastyrýda.
Abaı ýnıversıtetiniń bazasynda Lotarıngııa ýnıversıtetiniń, Dýlatı ýnıversıtetiniń bazasynda D.I.Mendeleev atyndaǵy Reseı hımııa-tehnologııalyq ýnıversıtetiniń, Qazaq ulttyq agrarlyq zertteý ýnıversıtetiniń bazasynda Tashkent aýyl sharýashylyǵyn ırrıgatsııalaý jáne mehanıkalandyrý ınjenerleri ınstıtýtynyń fılıaldary jumystaryn bastaǵanyn atap ótken jón.