Qazaqstanda qansha shashtaraz jáne sulýlyq salony bar

NUR-SULTAN. QazAqparat –Elimizdegi 17,4 myń shashtaraz jáne sulýlyq salony ishinde 16 myńǵa jýyǵy óz qyzmetin áli qalpyna keltirmegen nemese onlaın Onlaın baqylaý-kassa mashınalaryn (BKM) qoldanbaǵandyǵy anyqtaldy. Bul týraly QM Memlekettik kirister komıtetinen málim etti, dep habarlaıdy QazAqparat.

Aıta keteıik, elde engizilgen Tótenshe jaǵdaıdan keıin 4 mamyrdan bastap shashtarazdar men barlyq dúkender jumysyn bastaǵan bolatyn .

«Onlaın baqylaý-kassa mashınalaryn (BKM) engizýdiń arqasynda, qolma-qol esep aıyrysýlar týraly kelip túsken aqparat negizinde salyqtyq eseptilikti tapsyrmastan buryn, kásipkerlerdiń qyzmetine baryp tekserý júrgizbeı-aq, taldaýǵa múmkindik berildi. Komıtette chekter berilmegen baqylaý-kassa mashınalarynyń ornalasqan jeri týraly aqparat bar. Osylaısha, taldaý barysynda 17,4 myń shashtaraz jáne sulýlyq salony ishinde 16 myńǵa jýyǵy óz qyzmetin áli qalpyna keltirmegeni nemese onlaın BKM qoldanbaǵandyǵy anyqtaldy. Odan bólek, aýysym sońynda bir nemese eki chekti shyǵarý sııaqty faktiler de anyqtaldy. Baqylaý-kassa mashınalaryn paıdalanbaý jáne chekter bermeý - bul kásipkerlik kiristi jasyrý arqyly salyq zańnamasyn jáne tutynýshylar quqyǵyn buzý bolyp sanalady», - delingen Memlekettik kirister komıteti baspasóz qyzmetiniń málimetinde.

Jaqyn arada Komıtet jyl saıynǵy «Chekti talap et - júlde utyp al!» aktsııasyn bastaıdy. Onda jiberilgen chekteri úshin aktsııaǵa qatysýshylar uıaly telefonynyń teńgerimine birden aqsha alýyna múmkindigi bar. Eger chek berilmese, aktsııaǵa qatysýshylar mobıldi qosymsha arqyly tıisti shaǵymdy jibere alady. Osy oraıda shaǵym rastalsa, uıaly telefonnyń teńgerimine kepildendirilgen aqshany ala alady.

«Memlekettik kirister komıteti azamattardy taýarlar satyp alýda, jumystar men qyzmet chekterdi talap ete otyryp, azamattyq belsendilik tanytýǵa shaqyrady», - deıdi mamandar.

Budan buryn habarlanǵandaı, Qazaqstandaǵy shashtarazdar eki kúnniń ishinde 52,3 mln teńge tabys tapqan.