Qazaqstanda qansha prodakshn stýdııa bar

ASTANA. QazAqparat - Astana Media Week prodakshn kompanııalarǵa telearnalarmen baılanysýǵa biregeı múmkindik beredi. Mundaı pikirdi QR Aqparat jáne kommýnıkatsııalar mınıstri Dáýren Abaev bildirdi, dep habarlaıdy QazAqparat.

«Bizdiń telearnalar prodakshn kompanııalardyń kontentterin zerdeleý jumystaryna belsene qatysqanyn qalaımyn. Qazirgi ýaqytta prodakshn kompanııalardyń telearnalar basshylyǵyna shyǵýy óte qıyn ekendigin de bilemin. Kóptegen kezeńnen ótýge týra keledi. Al bul shara telearnalarmen jáne stýdııalarmen tikeleı suhbattasý múmkindigi. Búgin prodakshn kompanııalar óz ónimderin bizge tikeleı tanystyra alady», - dedi medıaaptalyqtyń ashylý rásiminen keıin BAQ ókilderine suhbat bergen mınıstr.
 

Sonymen qatar ol BAQ ókilderiniń otandyq prodakshn stýdııalardyń ózge eldermen salystyrǵanda qanshalyqty damyǵandyǵyna qatysty saýalyna jaýap berdi.

«Menińshe, reseılik brendtermen salystyrý durys bola qoımas. Naryq múldem basqa. Búgingi sharaǵa 93 prodakshn stýdııanyń qatysyp jatqanyna tań qaldyq. Bizde munshalyqty kóp stýdııanyń bar ekendigin de bilmedik. Sondyqtan da bul shara atalǵan salanyń damýyna tyń serpin bereri sózsiz», - dedi Dáýren Abaev.
 

Mınıstr «Qazmedıa» ortalyǵy damýdyń alǵashqy kezeńinen tabysty ótip, búginde barlyq stýdııalary jumys istep turǵanyn aıtty.

«Endi bul jumystarǵa kórshilerimiz, seriktesterimiz belsene qatysqanyn qalaımyz. Bizdiń sheteldik seriktesterimiz kelip, osynaý alańdy, stýdııalardy  fılmder túsirýge paıdalanǵany jón bolar edi. Bul ózara is-qımylǵa jaqsy bolady. Árıne, onyń barlyǵy aqyly negizde júrgiziledi. Biz «Qazmedıa» ortalyǵynda olardyń odan ári damýyna múmkindik beremiz», - dedi ol.