Qazaqstanda qansha oqýshyǵa bıýdjetten kómek kórsetiledi

NUR-SULTAN. QazAqparat – 385 myń oqýshyǵa bilim berý qorynan kómek kórsetilýi tıis. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Áleýmettik turǵydan osal toptaǵy balalar kontıngenti boljammen 385 myńdy quraıdy. Olarǵa jalpy bilim berý qorynan kıim-keshek, keńse zattaryn satyp alýǵa kómek kórsetilýi tıis. Ol úshin jergilikti bıýdjetten arnaıy qarjy bólindi. Biraq, Atyraý oblysynda áleýmettik turǵydan osal otbasylardan shyqqan balalarǵa materıaldyq kómek kórsetýge bólingen qarjy kólemi azaıdy jáne birkelki bólinbegen. Qazir osy jumyspen aınalysyp jatyrmyz», - dedi Ashat Aımaǵambetov.

Mınıstrdiń dereginshe, 31 myńnan astam bala avtobýspen tasymaldaýdy qajet etedi. Mektepterde tasymaldaýdy uıymdastyrý úshin 1 myńnan astam avtobýs bar. Avtobýs parki 454 birlikke jańartylǵan.

«Mektepterdi avtobýstarmen qamtamasyz etý boıynsha arnaýly jol kartasy bekitildi. Lızıng arqyly 515 jańa avtobýs satyp alý josparlanǵan», - dedi ol.