Qazaqstanda qansha ınternet-resýrs buǵattaldy

NUR-SULTAN. QazAqparat – «Jýsan» operatsııasy aıasynda terrorıstik belsendilik aımaǵynan qaıtyp kelgen 144 áıel radıkaldy kózqarasynan bas tartty. Operatsııanyń nátıjesi jaıly halyqqa esep berý kezdesýinde Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.

«Mınıstrliktiń endigi úlken jaýapty salasy – din salasy. Bul baǵytta bizdiń aldymyzda 3 ózara baılanysty mindet tur. Birinshisi – halyq arasyna zaıyrly memleket qundylyqtaryn nasıhattaý, ekinshisi – dinaralyq kelisimdi saqtaý, úshinshisi – dinı ekstremızmdi boldyrmaý», - dedi Aıda Balaeva OKQ alańy arqyly halyqqa esep berý kezdesýinde.

Mınıstrdiń aıtýynsha osy mindetterdi iske asyrý úshin birneshe baǵytta jumys júrgizilip jatyr.

«Bul – aqparattyq-túsindirý jumystary, destrýktıvti dinı kózqarastaǵy azamattardy raıynan qaıtarý jáne ınternet arqyly dinı ekstremızm ıdeologııasyna qarsy jumystar. Ótken 2019 jyly aqparattyq-túsindirý toptarynyń kúshimen 3 mılıondaı adamdy qamtyǵan 50 myńnan astam is-shara ótti. Din salasyndaǵy problemalyq suraqtarǵa jedel jaýap berý úshin 300 adamnan turatyn bilikti lektorlar pýly quryldy. Kórip otyrǵandaryńyzdaı, jumys óte tıimdi. Sondyqtan osy jyly biz bul toptardaǵy mamandardyń sanyn 500-ge deıin arttyryp, 1200 lektordy qaıta daıarlyqtan ótkizýdi josparlap otyrmyz», - dedi ol.

Aıda Balaeva sonymen birge «Jýsan» operatsııasynyń nátıjesinde elge oralǵan 163 áıelmen maqsatty túrde jumys júrgizilgenin, sonyń arqasynda olardyń 144-i radıkaldy oılarynan qaıtyp, birazy zaıyrly ómir saltyna ótkenin jetkizdi.

«Árıne, máseleniń saldarymen emes sebebimen kúresý kerek. Sondyqtan 2019 jyly 5300-den asa ınternet-resýrs saraptalyp, onyń 3200-nen zańǵa qaıshy materıaldar anyqtaldy. Olardyń barlyǵy der kezinde buǵattaldy. Túptep kelgende bul saladaǵy biz úshin eń mańyzdysy – halyqtyń radıkaldy aǵymdarǵa qarsy ımmýnıtetin qalyptastyryp, eldegi dinaralyq qaqtyǵystardyń aldyn alý», - dedi ol.