Qazaqstanda qansha benzın qory bar ekeni belgili boldy
18:37, 18 Mamyr 2020
NUR-SULTAN. QazAqparat – QR Energetıka vıtse-mınıstri Áset Maǵaýov elimizdegi qoımalarda qansha benzın bar ekenin aıtty, dep habarlaıdy QazAqparat tilshisi.
«Munaı ónimderin paıdalaný kóleminiń tómendeýi aıasynda janar-jaǵarmaı qaldyqtarynyń artýyn baıqadyq. Bıylǵy 15 mamyrdaǵy jaǵdaı boıynsha Aı-92 markaly benzıniniń qory 379 myń tonna qurady. Bul kólem shamamen 44 kúnge jetedi», - dedi vıtse-mınıstr Ortalyq kommýnıkatsııalar qyzmetinde.
Onyń sózine qaraǵanda, dızel otyny boıynsha 356 myń tonna jınalǵan. Otynnyń bul kólemi 34 kúnge jetkilikti.
Osy oraıda ol janar-jaǵarmaı materıaldaryn saqtaý qoımalarynyń tolyp ketýin boldyrmaýǵa, sondaı-aq munaı óńdeý zaýyttarynyń úzdiksiz jumysyn qamtamasyz etýge baǵyttalǵan sharalar qabyldanǵanyn eske saldy.
Budan buryn habarlanǵandaı, Áset Maǵaýov elimizde benzınge suranys tómendegenin aıtty.