Qazaqstanda qansha bankomat bar

NUR-SULTAN. QazAqparat – Qazaqstanda bankomattar sany 12 myńnan asty. Árbir 10 qurylǵynyń tórteýi klıentterge qolma-qol aqsha berýmen qatar qarajatty kartaǵa salýǵa da múmkindik usynady, dep habarlaıdy QazAqparat tilshisi ranking.kz-ke silteme jasap.

2020 jyldyń qańtar-tamyzynda el aýmaǵynda qazaqstandyq jáne sheteldik tólem kartalarymen 10,4 trln teńge aqsha qolma-qol alyndy. Ótken jylmen salystyrǵanda kórsetkish ózgermedi desek te bolady. Degenmen, 0,1 paıyz ósim bar.

Jalpy, Qazaqstan aýmaǵynda tólem kartalaryndaǵy jıyntyq aınalymnan qolma-qol aqsha sheship alý 59,9 paıyzdan 35,8 paıyzǵa deıin qysqaryp, turǵyndar qolma-qol aqshasyz tólem jasaýǵa kóshkenin baıqaýǵa bolady. Nebári osydan 5 jyl buryn ǵana bankomattar men bank bólimshelerinen aqsha sheship alý aınalymǵa túsken qarajattyń 90 paıyzynan asyp jyǵylatyn.

Kartadaǵy qarajatty sheship alý kóleminiń qysqarýy elimizdiń 3 óńirinde baıqalady. Al qalǵan oblystarda 0,9 paıyzdan 27,7 paıyzǵa deıin ósim bar. Bul rette almatylyqtar qolma-qol aqsha ustaýdan bas tarta bastaǵany anyq bilinedi. Degenmen, osy qala turǵyndary esepti kezeńde kartalarynan 2,1 trln teńge sheship alyp, óńirler arasynda kósh bastap tur.

Qolma-qol aqshalardyń basym kólemi bankomattardan alynǵan. Onyń kólemi 8 aıda 9,6 trln teńgege jetti. Bul ótken jylmen salystyrǵanda 10,6 paıyzǵa kóp. Elimizde bankomattar sany da artyp, 2020 jyldyń І-jartyjyldyǵynda 12 myńnan asyp tústi. Barlyq bankomattyń úshten biri Almaty (2,3 myń) men Nur-Sultan (1,5 myń) qalalarynda shoǵyrlanǵan. Al Túrkistan men Qaraǵandy oblystarynyń jáne Shymkent qalasynyń árqaısysynda 1 myńnan sál asatyn bankomat bar.