Qazaqstanda qandaı salada jaldanatyn jumyskerlerge suranys artady

ASTANA. QazAqparat – Aldaǵy 8 jylda elimizde jaldanatyn jumyskerlerge suranys 2 mln adamdy quraıdy. Bul týraly Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat.

Kadrlarǵa qajettiliktiń 2023-2030 jyldarǵa arnalǵan orta merzimdi boljamy jasaldy. Oǵan sáıkes, eń yqtımal stsenarııde jaldamaly jumyskerlerge suranys, onyń ishinde jańa suranys pen kadrdy aýystyrý boıynsha suranys shamamen 1,9 mln adamdy quraıdy.

Boljamdy jasaǵan «Eńbek resýrstaryn damytý ortalyǵy» AQ (ERDO) ekonomıkanyń ósýinen týyndaıtyn jaldamaly jumysshylarǵa degen suranysty eskergen. Sondaı-aq jaldamaly jumysshylardy aýystyrý boıynsha zertteý adamdardyń zeınetke shyǵýy men jumys isteıtin jaldamaly jumysshylardyń kútiletin ólim-jitimi negizinde jasalǵan.

Boljamǵa sáıkes, jańa suranystyń úlesi 45% (867 myń adam), al kadrdy aýystyrý boıynsha suranystyń úlesi 55% (1 mln adam) quraıdy.

ERDO sarapshylary optımıstik stsenarıı boıynsha suranys kólemi 2,1 mln adam, al pessımıstik stsenarıı boıynsha 1,8 mln adam bolatynyn atap ótedi.

Óńirlik bóliniste megapolısterde halyqtyń shoǵyrlanýy jáne ýrbanızatsııa jalǵasatyn bolady. Osylaısha, jaldamaly jumyskerlerge eń úlken jıyntyq suranys Astana jáne respýblıkalyq mańyzy bar qalalar – Almaty men Shymkentte kútiledi. Boljamdy stsenarııge baılanysty qajettilik 420-dan 536 myń adamǵa deıin quraıdy (jalpy respýblıkalyq kólemnen 24-26%). Eń az suranys ortalyq, shyǵys jáne soltústik óńirlerde qalyptasady.

«Jaldamaly jumysshylarǵa suranys 2028 jyly kútiletin eń joǵary deńgeıge jetkenge deıin artady, sol kezde boljamdy qajettilik 261 myń adamdy quraıdy. Bul ishinara 2023 jyldan 2028 jylǵa deıin áıelderdiń zeınetkerlik jasyn arttyrý toqtatyla turatyndyǵyna baılanysty», – dep atap ótti ERDO Boljaý departamenti dırektorynyń orynbasary Qaıyrbek Aıashev.

Salalar boıynsha. Jaldamaly qyzmetkerlerge eń úlken jıyntyq qajettilik bilim berý (395,6 myń adam), aýyl sharýashylyǵy (196,3 myń adam) jáne saýda (193,2 myń adam) salalarynda bolady. Bilim berý salasynyń kadrlarǵa degen joǵary qajettiligi elde 2000-shy jyldardyń basynan beri baıqalyp kele jatqan «bebı- býmǵa» baılanysty.

Taýarlardy tasymaldaý jáne bólý salasynda (saýda, kólik jáne qoımalaý, turý jáne tamaqtaný qyzmetteri) kórsetilgen kezeńde jaldamaly jumyskerlerge suranys 336-dan 384 myń adamǵa deıin bolady dep kútilýde.

Bıznes-qyzmetter salasynda (aqparat jáne baılanys, qarjy jáne saqtandyrý, jyljymaıtyn múlikpen jasalatyn operatsııalar, kásibı jáne ǵylymı qyzmet, ákimshilik jáne qosalqy qyzmet kórsetý) jaldamaly qyzmetkerlerge keleshektegi suranys 268-den 314 myń adamǵa deıin artady.

Ónerkásipte jaldamaly jumyskerlerge suranys – 219-259 myń adam (jıyntyqtan 12%), aýyl sharýashylyǵynda – 193-200 myń adam (10-11%), ózge de qyzmetter salasynda – 105-130 myń adam (6%), qurylys sektorynda 91-111 myń adam (5%) deńgeıinde kútiledi.