Qazaqstanda kámeletke tolmaǵandarǵa dinı kitaptar satýǵa tyıym salynbaq

ASTANA. QazAqparat - Elimizdiń bas bostandyq aıyrý oryndarynyń barlyq kitaphana qoryndaǵy materıaldarǵa saraptama júrgizildi. Bul jaıynda búgin QR Din isteri jáne azamattyq qoǵam mınıstrliginiń jumys nátıjesine arnalǵan qoǵamdyq keńes otyrysynda mınıstr Nurlan Ermekbaev málim etti, dep habarlaıdy QazAqparat.

«Din isteri jáne azamattyq qoǵam mınıstrligi «Dinı qyzmetter jáne dinı birlestikter máseleleri jónindegi QR-nyń keıbir zańnamalyq aktilerine ózgertýler men tolyqtyrýlar engizý týraly» zań jobasyn ázirleý ústinde. Qazirgi ýaqytta bul túzetýler ázirleý satysynda», - dedi ol.

Osy rette mınıstr atalǵan zań jobasynda kózdelip otyrǵan birqatar negizgi normalarǵa da toqtaldy.

«Qysqasha toqtalar bolsam, atalǵan zań jobasynyń negizgi normalary qatarynda máselen, kámelettik jasqa tolmaǵandardy dinı qyzmetke tartqany, din salasyndaǵy zańdardy buzǵany úshin jaýapkershilik kúsheıtiledi. Munan bólek, qoǵam tarapynan kámelettik jasqa tolmaǵandarǵa dinı ádebıetterdi satýǵa, jumys ýaqytynda memlekettik qyzmetshilerdiń dinı rásimderge qatysýyna shekteý qoıý usynylýda», - dedi Ermekbaev.

Onyń aıtýynsha, zań jobalary normalarynyń kelesi bir blogy dinı ádebıetterdi taratý tájirıbesin jetildirýdi, dintaný saraptamalaryn júrgizýdi qamtıdy.

«Mıssıonerlik qyzmetti retteý, shetelde dinı bilim alýdy retteý jónindegi normalar da bar. Qoǵam usynyp otyrǵan osy bastamalardyń barlyǵy da qoǵammen jáne sarapshylarmen talqylanady. Osylaısha, biz qoǵamnnyń tolyqqandy jáne obektıvti pikirin alyp, ony atalǵan qujatta bekitkimiz keledi. Bul jumystardyń negizgi maqsaty bul - elimizdiń bolashaqtaǵy qaýipsizdigi men turaqtylyǵy», - degen mınıstr zań jobasynyń osy jyldyń sońyna deıin Májilis qaraýyna engizý josparlanyp otyrǵandyǵyn eskertip ótti.