Qazaqstanda qalaıy óndirýge salyq mólsheri azaıtylmaq

ASTANA. QazAqparat - Qazaqstanda qalaıy óndirýge salyq kólemin azaıtý josparlanyp otyr. Bul týraly Parlament Májilisinde Salyq kodeksiniń jobasyn tanystyrý kezinde QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.

«Jer qoınaýyn paıdalaný salasynda geologııalyq barlaýǵa ınvestıtsııalar yntalandyrylatyn bolady. Álemdik praktıkany eskerip, kómir boıynsha eksporttyń júktemesin renta salyǵyna aýystyra otyryp, taý-ken salasy úshin ústeme paıda salyǵyn alyp tastaý usynylady. Álemdik tájirıbede taý-ken salasy úshin mundaı salyq joq. Shyn mánisinde, atalǵan salyqty tek kómir óndirýshi kompanııalar tólep kelgen»,-dep túsindirdi Dálenov.

Onyń sózine qaraǵanda, tabysty barlaý júrgizýdi yntalandyrý maqsatynda kommertsııalyq anyqtaý bonýsyn alyp tastaý josparlanýda. Teńiz jáne tereń munaı ken oryndary úshin jer qoınaýyn paıdalanýda óte qarapaıym balamaly salyq usynylady. Qatty paıdaly qazbalardy barlaýdy jedeldetý úshin jaldaý tólemderiniń tetigi engiziledi. Investorlardy yntalandyrý úshin dıvıdendterdi jáne 35 paıyzdan artyq óndirilgen shıkizatty óńdegen jaǵdaıda, jer qoınaýyn paıdalanýshy aktsııalarynyń ósimin korporatıvtik tabys salyǵynan bosatý usynylyp otyr.

Belgili bolǵandaı, munaı men gazdy ózindik qunynan tómen ótkizý kezindegi kiristerdi anyqtaý boıynsha tásilder qaıta qaralady.

«Sondaı-aq qalaıy boıynsha paıdaly qazbalardy óndirýge arnalǵan salyǵynyń mólsherlemesin 6%-dan 3%-ǵa tómendetý usynylady. Bul metallýrgııanyń jańa salasy - qalaıy ónerkásibin qoldaý úshin jasalyp otyr»,-deıdi ol.