Qazaqstanda kafe-meıramhanadaǵy baǵa bir jylda 23% qymbattaǵan

ASTANA. QazAqparat – Elimizde qoǵamdyq oryndarda tamaqtaný kezinde kórsetiletin qyzmet túri qymbattaǵan, dep habarlaıdy QazAqparat Ranking.kz resýrsyna silteme jasap.

Ótken jyldyń qarashasynda qoǵamdyq tamaqtaný uıymdarynyń qyzmeti bir aıda 2,7%-ǵa, al bir jyldyń ishinde 23,4%-ǵa qymbattady.

Ásirese baǵa ósimin Jetisý oblysynyń turǵyndary qatty sezindi. Atalǵan óńirde birden 13,9%-ǵa ósken.

Sondaı-aq, úshtikke Shymkent jáne Almaty oblysy da kirdi. Onda bir aıda 9,9% jáne 7,3%-ǵa artqan. Jeti óńirde bir aıdyń ishinde baǵa ózgermegen.

Jyldyq dınamıkada baǵanyń qatty ósimi sol Jetisý oblysynda tirkeldi. Qyzmet kórsetý quny birden 44,7%-ǵa artqan.

Odan bólek, Shymkent (40,3%) pen Astanada (38,5%) baǵa aıtarlyqtaı ósken. Eń tómen baǵa Pavlodar oblysynda baıqaldy, jyl ishinde 6,2%-ǵa artqan.

Qoǵamdyq tamaqtaný obektileri arasynda ashana qyzmeti bir jylda 26,6%-ǵa, jyldam tamaqtaný oryndarynda 17,1%-ǵa, meıramhana, dámhana jáne soǵan uqsas mekemelerde 20,6%-ǵa qymbattady.

Onyń ishinde meıramhanada túski as quny 19%-ǵa, al ashanada 26,6%-ǵa ósti.

Meıramhana men dámhanada qyzmet kórsetý baǵasynyń eń joǵary jyldyq ósimi Jetisý oblysynda (44,4%), eń tómeni Almatyda (5,2%) tirkeldi.

Jyldam tamaqtaný oryndarynda qyzmet baǵasynyń eleýli ósimi Atyraý oblysynda (38%), al arzanshylyq Pavlodar oblysynda (4,5%) baıqaldy.

Ashana qyzmeti boıynsha joǵary baǵa Jetisý oblysynda (52%), eń tómengisi Pavlodar oblysynda (7%).

Sonymen qatar, ótken jyldyń úshinshi toqsanynyń qorytyndysy boıynsha meıramhanalar men qoǵamdyq tamaqtandyrý oryndaryn jalǵa alý quny bir jylda 5%-ǵa ósti.